विराटनगर, साउन ७ — नेपाली कांग्रेसको १५औँ महाधिवेशनअन्तर्गत आज देशभरका ७५३ वटै स्थानीय तहमा एकैसाथ पालिका अधिवेशन हुँदैछ। स्थानीय तहको सांगठनिक संरचना निर्माणका लागि पार्टीले पालिका तहको नेतृत्व चयन प्रक्रिया आजैबाट अघि बढाएको हो।
पार्टीको नयाँ विधान तथा निर्वाचन निर्देशिका अनुसार हरेक पालिकामा सभापति, महिलासहित दुई उपसभापति, सचिव र सहसचिव गरी पाँच जना पदाधिकारी प्रत्यक्ष निर्वाचित हुनेछन्, जबकि कोषाध्यक्ष भने निर्वाचित कार्यसमिति सदस्यमध्येबाट सभापतिले मनोनयन गर्नेछन्।
कांग्रेस केन्द्रीय निर्वाचन समितिका अनुसार यसअघि देशभर वडा तहका अधिवेशनहरू छिटपुट स्थान बाहेक शान्तिपूर्ण र उत्साहजनक रूपमा सम्पन्न भइसकेका छन्। बाढीपहिरो प्रभावित नुवाकोट र धादिङका सबै वडामा मंगलबारै अधिवेशन सकिएको छ भने मधेश प्रदेशका सिरहा, सप्तरी, सर्लाही र पर्साका केही वडामा पनि सफलतापूर्वक सम्पन्न भइसकेको छ। भौतिक तथा मानवीय क्षति बेहोरेको रसुवामा भने विशेष परिस्थिति हेरी केही दिनपछि मात्र अधिवेशन गरिने निर्वाचन समितिकाे तयारी रहेकाे छ ।
