विराटनगर, कार्तिक २८
बिराटनगरबाट संचालित पार्थ इन्टरनेशनल कम्पनीले लिएको १० करोडको कर्जा शंकास्पद भएको पाईएको छ ।
उक्त लोन पास गर्ने नेपाल बंगलादेश बैंकका कार्यकारी अधिकृत (सिइओ) जानेन्द्र ढुंगानालाई राष्ट्र बैंकले केरकार गर्न थालेपछि उक्त कुरा बाहिर आएको हो । उक्त विषयमा राष्ट्र बैंकले ढुंगानालाई गत भदौमा नै प्रष्टिकरण सोधिसकेको छ ।
पार्थ इन्टरनेशनलले १ करोड ८९ लाख रुपैयाँ भ्यालु भएको सम्पत्ति बैंकमा धितो राखेको थियो । उक्त धितोमा ९ करोड ९० लाख रुपैयाँ कर्जा स्वीकृत भयो ।
उक्त कम्पनी रेशु अग्रवालको नामा दर्ता छ । अग्रवाल गृहीणी हुन् , व्यवसायी होईनन् । यी सबै खेलको पछि उनको श्रीमान् नरेन्द्र अग्रवालको हात छ भन्ने स्रोत बताउँछ ।
पार्थ इन्टरनेशनल २०७५ असार २० गते बाणिज्य कार्यलय विराटनगरमा दर्ता भएको थियो । कम्पनी दर्ता भएको २ हप्ता बित्न नपाउदै नेपाल बंगलादेश बैंकले ९ करोड ९० लाख रुपैयाँ कर्जा स्वीकृत गरेको थियो ।
धितो भन्दा पाँच गुणा बढी ऋण दिईनु र आवेदन दिएको १० दिन बित्न नपाउदै ऋण पास हुनुमा राष्ट्र बैंकले आशंका व्यक्त गरेको छ ।
विवाद बाहिर आएपछि हाल नरेन्द्र अग्रवाल सम्पर्क बिहिन बनेका छन् ।
स्रोत : क्लिकमाण्डू डट कम
