काठमाडौं, श्रावण २४
धदिङको बेनीघाटमा सलाङघाटस्थित त्रिशूली नदीमा बस खस्दा तीन जनाको मृत्यु भएको छ । ४५ यात्रु लिएर सर्लाहीको सदरमुकाम मलंगवाबाट काठमाडौं जाँदै गरेको बस दुर्घटना हुदा १६ जना घाईते समेत भएका छन् । प्रहरीको अनुसार १६ जनाको उद्धार भईसकेको र थप २६ जना अझै बेपत्ता रहेका छन् । मृतक मध्ये सर्लाहीका अजय दास र विजय कुर्मीको सनाखत भएको छ एकजनाको सनाखत हुन सकेको छैन । दुर्घटनाग्रस्त बसभित्र भने कोही पनि नभेटिएको प्रहरीले जानकारी दिएको छ ।
प्रहरीका अनुसार उद्धार गरिएकामा भुपेन्द्रकुमार यादव, अनिष राय, सुनिता रोकाया, शिखरकुमार महतो, राकेश बैठा, सञ्जय महतो, जहेन्दर ठाकुर, रोहितकुमार मण्डल, शमिमराजा अन्सारी, धीरेन्द्र ठाकुर, चालक लक्ष्मण जमरकट्टेल, विजयराय यादव, दिनेश ठाकुर, भोगेन्द्र चौधरी रहेका छन् । बसचालक जीवन भनिने लक्ष्मण जमरकट्टेल अचेत अवस्थामा भेटिएका छन् भने सहचालक प्रमोद चौधरी र कन्डक्टर ऋषि उप्रेतीलाई उपचारका लागी काठमाडौं लगीएको छ ।
शुक्रबार बिहान करिब ४ बजे ना ६ ख ७४६९ नम्बरको उक्त सृष्टि डिलक्स बस त्रिशूलीमा खसेको थियो ।
