विराटनगर, वैशाख १६
विराटनगरका होलसेल व्यापारीहरुले भोला गुट्खा लुकाएर व्यापक कालोबजारी गरिरहेको खुलासा भएको छ । आगामी दिनमा हुनसक्ने लकडाउनलाई मध्यनजर गर्दै होलसेलरले गुट्खा लुकाएर बजारमा कृतिम मुल्यवृद्धि गरीरहेको खुल्न आएको छ ।

उद्योगबाट २१२ रुपैयाँ प्रति प्याकेटमा वितरण भईरहेको भोला गुट्खा बुधवार विराटनगर बजारमा ३ सय ५० रुपैयाँमा बिक्रि भईरहेको भेटिएको छ । २ सय ५० रुपैयाँमा खुद्रा व्यापारीले सहजै पाउनु पर्ने गुट्खा अचाकली प्रति प्याकेटमा १ सय रुपैयाँ बृद्धि गरेर होलसेलरले बेचीरहेको पाईएको छ । सोही कारण उपभोक्ताले प्रति पाउँच ५ रुपैयाँमा खरिद गर्नेे गुड्खालाई अहिले ८ रुपैयाँ तिर्नुपर्ने बाध्यता आएको छ ।

होलसेलरबाट नै महंगोमा गुट्खा आएकोले बाध्य भएर आफुहरुले मुल्यवृद्धि गर्नु परेका खुद्रा व्यापारीहरुको भनाई छ । उता भोला गुट्काको डिलरले भने आफुहरुले पुरानै रेटमा गुट्खा दिईरहेको तर होलसेलरले गुड्खा अनावश्यक स्टकमा राखी गुट्खाको कृतिम मुल्यवृद्धि गरेको बताएको छ ।

भोला गुट्खाको उत्पादक श्रीराम टोब्याको उद्योगले पनि गुट्खाको मुल्यमा कुनै पनि प्रकारको फेरबदल नगरेको बताएको छ । र तत्काल मुल्यवद्धि गर्नुपर्ने कुनै कारण नरहेको स्पष्ट समेत पारेको छ । आगामी दिनमा लकडाउन भएपनि उद्योग संचालनमा रोकतोक नगर्ने सरकार र उद्योगीहरु विच सहमति भएकाले गुट्खाको अभाव उद्योगले हुन नदिने बताएको छ ।
तसर्थ मौकाको दाउछोपी कलोबजारी गर्ने होलसेलरलाई प्रशासनले छानीछानी कारवाही गर्नु जरुरी देखिएको छ ।

तपाईको प्रतिक्रिया