बिराटनगर, जेष्ठ ४
निरज बस्नेत
बिराटनगर संग सिमाना जोडिएको कटहरी गाउँपालिकाको अध्यक्षमा नेपाली कांग्रेसका देवराज चौधरी विजयी भएका छन् । ६ हजार ५ सय ६५ मत ल्याएका चौधरीले निकटतम प्रतिद्धन्द्धी एमालेका सुवास सरदारलाई ८ सय ८३ मतान्तरले हराएका हुन् । सरदारको ५ हजार ६ सय ८२ मत आएको हो । लोकप्रिय चौधरीलाई कटहरीवासीले रुचाएको देखियो ।
यसअघि यस गाउँपालिकामा ७४ को स्थानीय चुनावमा कांग्रेसकै रामकुमार कामत विजयी भएका थिए । त्यस्तैगरी गाँउपालिका उपाध्यक्ष्यमा कांग्रेसले आफ्नो साख गिराएको छ । एमालेकी सितादेवी राजवंशीले कटहरी गाउँपालिकाको उपाध्यक्षमा विजयी हात पारेकी छिन् । ५ हजार ८ सय ४८ मत सहित राजवंशीले कांग्रेसकी मन्जिता सरदारलाई १ सय ४३ मतान्तरले हराएकी छिन् । यसअघि ७४ को स्थानीय चुनावमा उपाध्यक्षमा यिनै मन्जिता विजयी भएकी थिईन् ।
५० हजारको हाराहारीमा जनसंख्या रहेको यस गाउँपालिकामा २७ हजारको आसपास मतदाता रहेको छ । ७ वटा वडा छन् । १, २, ५, ६ र ७ गरी एमालेले ५ वटा वार्डमा विजय प्राप्त गरेको छ । कांग्रेसको भागमा ३ र ४ परेको छ ।
