विराटनगर,असोज ४
निरज बस्नेत
नेपालीहरुको महान् चाड वडा दशैंको चहलपहल शुरु भएको छ । दशैं अगावै बजार गुलजारमय बनेको छ । किनमेल गर्नेको संख्यामा ह्वात्तै वृद्धि भएको छ ।
वालवच्चादेखि वृद्धसम्मले सपिंङ गरेको बजारमा यत्रतत्र देख्न पाईन्छ । विशेषगरी गृहिणीहरु ज्यादा किनमेलमा रुचि राख्छन् । मूलतः घर–घरमा यतिवेला दशैलाई लक्षित गरी विशेष योजना बन्न थालिसकेको छ । केटाकेटीलाई नयाँ–नयाँ लुगा किन्नको हतारो, जवानलाई नयाँ लुगाको साथमा नयाँ ठाउँतर्फ घुम्न जाने चाँजोपाजो मिलाउनुपर्ने लगायत अन्य रमाईलो गर्ने बन्दोबस्त मिलाउन मानिसहरु बजारतर्फ भौतारिरहेको अहिले भेटिन्छन् ।
पढाई तथा कामको शिलशिलामा शहर आएकाहरु पनि परिवारको लागी सरसमाग्री खरिद गर्न बजार पुगीरहेका छन् । विभिन्न गाडीघोडा कम्पनीहरुले पनि दशैको मौकापारि विशेष स्किमहरु निकाल्ने भएकाले पनि यसबेला बजारका शोरुमहरुमा पनि भिडभाडै हुन्छ ।
स्कूल , कलेज , अफिस समेत लामो विदा हुनाले दशैंको महत्व झन् बढि छ । विदेशमा रहेका नेपाली दाजुभाई–दिदिवहिनीहरु समेत स्वदेश फर्किने भएकाले यसको आफ्नै खाले मौलिक विशेषता छ । यसपालिको दशैंको शुरुवात असोज १० घटस्थापनाबाट छ ।
