विराटनगर, असोज ६
निरज बस्नेत
विराटनगरमा यही १० असोजबाट हुने विराट राजवंशी दोस्रो महोत्सवको तयारी अन्तिम चरणमा पुगेको छ । सो कुराको जानकारी आयोजक संस्था विराट राजवंशी प्रगतिशिल विकास समाज समितिका अध्यक्ष किरण राजवंशीले दिएका छन् ।
स्थानीय खेल मैदान हाटखोलामा हुने महोत्सवमा ६० वटा आकर्षक स्टलहरु रहने छन् । ३० भन्दा बढी स्टल बुक भईसकेका छन् । बाँकी, धमाधम बुकिङको प्रक्रियामा लाग्दै गरेको जानकारी महोत्सव समितिका प्रमुख व्यवस्थापक नारायण अधिकारीले बताएका छन् ।
महोत्सवमा आकर्षणका रुपमा स्थानीय,राष्ट्रिय तथा अन्तराष्ट्रिय कलाकारहरुको धमाकेदार प्रस्तुति रहने महोत्सव समितिका व्यवस्थापक गौरी लिम्वू बताउँछन् । यसपालि राष्ट्रिय कलाकारहरुमा, सुमित खड्का, ज्योती मगर, प्रमोद खरेल, टंक बुढाथोकी, मेलिना राई, प्रिती आले, प्रकाश सपूत, अशोक दर्जीको साथमा नेपालीभाषी अन्र्तराष्ट्रिय गायक प्रशान्त तामाङको समेत बेजोड प्रस्तुति रहने छ ।
साथसाथै, बालबालिकाका लागि, बाल उधान, विविध खेलसामाग्री, रोटे पिङ, कोलम्वस नाउँ, ड्राइगन रेल, लगायत अन्य रहेको कुरा अध्यक्ष राजवंशी बताउछन् । खानाका मिठा–मिठा परिकारको स्टल रहने हुनाले पनि खानाका स्वाद पारखीहरुको लागि महोत्सव थप रमाईलो हुनसक्दछ ।
महोत्सव पूरै पारिवारिक वातावरण हुनेछ । १० असोज घटस्थापनाको दिनमा शुरु हुने महोत्सव २१ असोजसम्म गरी १२ दिन चल्नेछ । प्रत्येक दिन विहान ११ बजेदेखी राती १० बजेसम्म महोत्सव हुनेछ । स्मरण रहोस् यसअघिको प्रथम विराट राजवंशी महोत्सव अत्यधिक सफल रहेको थियो ।
