दिनेश खड्का
विराटनगर, असोज १५
अनाधिकृत सीमा पर्खाल हटाउन विराटनगर महानगरपालिकाले सूचना जारी गरेको छ । सूचनामा नक्शा पास गराउदाँ ईजाजत दिईएको क्षेत्रभन्दा बाहिर बनाईएको पर्खाल हटाउन महानगरले भनेको छ ।
महानगरको शहर पूर्वाधार विकास महाशाखाले शनिवार सार्वजनिक सूचना जारी गरी अनाधिकृत पर्खाल तथा संरचना हटाउन १५ दिने अल्टिमेटम दिएको हो । १५ दिनभिपछि महानगरले त्यस्तो संरचना हटाउने र त्यसवापत लाग्ने खर्च समेत घरधनीबाट असुलउपर गर्ने भनेको छ ।
विषेश गरी बजारक्षेत्रमा बनेका घर तथा भवनहरु प्रचलित भवन निर्माणसम्बन्धी मापदण्ड अनुसार नहुदाँ विराटनगरका सडक तथा सार्वजनिक ठाँउहरु साँघुरिएका छन् ।
काठमाडौंमा स्वतन्त्रबाट मेयर बनेका बालेनले पदवहाली गरेको केहि समयमानै अनाधिकृत संरचना हटाउने काम शुरु गरेका थिए । यो कामले लोकप्रियता पाएपछि देशका विभिन्न पालिकामा जितेका जनप्रतिनिधिहरु अनाधिकृत संरचना हटाउन तम्सिएका छन् ।
तर पार्टिबाट जितेर आएका जनप्रतिनिधिलाई भने स्वतन्त्रजस्तै काम गर्न सजिलो र छुट पनि छैन् । सडक तथा सार्वजनिक जग्गा मिचेर रजगज गरिरहेका समाजका बढेमानहरुले यो कामलाई सफल हुन नदिने पक्कापक्की नै छ । अझ चुनाव नजिकिदै गएको बेला बढेमानहरु रुष्ट हुने काम गर्न जनप्रतिनिधिलाई पार्टिलेनै दिन सक्ने अवस्था देखिदैन ।
