विराटनगर, मंसिर २४
मंसिर २९ गतेदेखि विराटनगरमा आयोजना हुन लागेको विराट एक्स्पोको प्रचार प्रसारका लागि मोटर र्याली आयोजना गरिएको छ ।
कृषि तथा औद्योगिक अन्तर्राष्ट्रिय प्रदर्शनीको प्रचार प्रसारका लागि शनिबार उद्योग संगठन मोरङबाट निकालिएको र्याली एक्स्पो आयोजना स्थल विराटनगरस्थित डिग्री क्याम्पस, विराटनगरको महेन्द्र चोक, बरगाछी हुँदै सुनसरीको दुहबी, इटहरी, धरान पुगेको थियो ।
र्यालीले मोरङको विराटचोक, उर्लाबारी हुँदै विर्तामोड पुगेर पुनः विराटनगर आएको आयोजक समितिले जनाएको छ । आयोजकसमितिका प्रचार प्रसार संयोजक नन्दकिशोर राठीले एक्स्पोको प्रचार प्रसारका लागि मोटर र्यालीको आयोजना गरिएको जानकारी दिए
र्यालीको अग्रभागमा विराट एक्स्पोको मस्कट राखिएको थियो । मस्कटले अहिलेको आधुनिक प्रविधिलाई उद्योग, कृषि, पर्यटन क्षेत्रमा कसरी प्रयोग गर्न सकिन्छ भन्ने संकेत गरेको विराट एक्स्पोका ब्राण्डिङ आशिष लामिछानेले बताए । उनले एक्स्पोमा राखिएको ट्याक्टर हाँकिरहेको मस्कटले शेयर बजारको बुलिस ट्रेण्डको संकेत जस्तै उद्योग, व्यापार, व्यवसाय, कृषि, पर्यटनको प्रगतिको संकेत रहेको बताए । मस्कटको नाकमा भएको मुन्द्र्राले महिलाको संकेत गरेको र उद्योग, व्यापार, व्यवसायीक क्षेत्रमा महिलाको भूमिका महत्वपूर्ण रहेको संकेत गरिरहेको बताए ।
त्यसैगरी, एक्स्पोको प्रवर्द्धनका लागि भारत विहारको पुर्णियामा शनिबार पत्रकार सम्मेलन गरिएको छ । सीमावर्ती क्षेत्रबाट ठूलो संख्यामा भारतीय नागरिकहरु एक्स्पो अवलोकन गर्न आउने अपेक्षा गर्दै पत्रकार सम्मेलन गरिएको प्रचार संयोजक नन्दकिशोर राठीले बताए ।
