विराटचौक, पुष ९
निरज बस्नेत
दुई अर्व ५० करोडको लगानीमा सुनसरीको दुहवीमा नयाँ डण्डी उद्योग संचालनमा आएको छ । यससम्वन्धि जानकारी शुक्रवार विराटचोकमा आयोजित पत्रकार सम्मेलनका क्रममा दिइएको हो ।
दुहवी नगरपालिका–१ मा खुलेको यो स्वस्तिक रोलिङ मिलमा विराटनगरका उद्यमी हस्तीहरु, रमेश राठी, राजकुमार गोल्छा, जीवन रिजाल र गुड्डु खानको लगानी रहेको बताइएको छ ।
यस रोलिङ मिलमा रडको बिलेटको समेत काम हुनेगरी संचालनमा ल्याइएको हो । यो उद्योग कोरोनाकालपछि खुलेको ठूलो उद्योग रहेको संचालकमध्येका एक रमेश राठी बताउँछन् । अर्का संचालक राजकुमार गोल्छाका अनुसार बजरङ ब्राण्डमा टीएमटी छड, बिलेट, एङल च्यानल र आई बिम उत्पादन गरेर बजारमा पठाइसकिएको छ । यसले परिक्षण उत्पादनकाल पूरा गरेर नेपाल गुणस्तर तथा नापतौल विभागबाट नेपाल गुणस्तर चिन्ह प्राप्त गरिसकेको अर्का संचालक जीवन रिजालले बताएँ ।
सरकारको मापदण्डभित्र रहेको यस उद्योगको क्षमता ५ सय टन रहेको संचालक गुड्डु खानले जानकारी गराएँ । यस उद्योगले विशेषगरी टीएमटी छड चाही बढी उत्पादन गर्नेमा सवै साझेदारहरु एकमत छन् । उद्योगले ७ एमएम देखी ३२ एमएमसम्मका टीएमटी छड उत्पादन गर्नेछ । छडमा ग्रिपिड उच्चस्तरको रहेको छ । यसले मसला बलियोसँग समात्छ । र, लचकदार समेत हुने छ ।
यो रड ५ सय ग्रेडको हुन्छ । यूरोपियन टेक्नोलोजीको भएकाले पूर्णतया अटोमेटिक प्रणालीमा आधारित रहेको पत्रकार सम्मेलनकका क्रममा जानकारी गराइयो । तौलको समानता र गुणस्तरमा एकरुपता रहेको तथा प्रयोगशालाको स्पेक्ट्रो मेसिनले केमिकल परिक्षण गरेपछि डण्डी उत्पादन गरिने हुँदा यो भरपर्दो हुनजान्छ ।
कम्पनीले भारतको टाटा स्टिलवाट कच्चा आयात गर्नेछ । स्पन्च आयात गरी नेपालमा स्क्राब्ब प्रयोग गरिने भएको छ । यस मिलले अहिले ६० प्रतिशत उत्पादन गरिरहेकोमा माघबाट शतप्रतिशत हुने संचालक राठी दावी गर्छन् । यसमा दैनिक ३ सय जनाले रोजगार पाइरहेका छन् । आगामी माघबाट ६ सयले रोजगार पाउने संचालक रिजाल बताउछन् ।
