निरज बस्नेत
विराटनगर, पुष २१
विराटनगर हस्पिटल चोकमा रहेको टाट पल्टेको संजीवनी हस्पिटलका संचालक दिवाकर यादव बलात्कार आरोपमा पक्राउ परेका छन् । उनलाई मोरङ प्रहरीले पक्राउ गरेको हो ।
३३ बर्षिय यादवले सुनसरी औरावनी घर भई विराटनगर–२ मा बस्दै आएकी २७ बर्षिय एक नर्सलाई बलात्कार गरेको गम्भिर आरोप लागेको छ । ती नर्सलाई भदौं २१ गते साढे १२ बजे दिउँसो विराटनगरस्थित डेरामा जवरजस्ती करणी गरी कुटपिट गरेको यादवमाथि आरोप छ ।
पीडितले गएको भदौंको अन्त्यमा नै मोरङ प्रहरीमा जाहेरी दिएकी थिइन् । पीडितले दिएको जाहेरी कै आधारमा मोरङ प्रहरीले ४ महिनापछि पक्राउ गरेको हो । पक्राउ परेका यादवलाई प्रहरीले आइतवार मोरङ जिल्ला अदालतमा जवरजस्ती करणीमा म्याद थप गरी अनुशन्धान सुरु गरेको जिल्ला प्रहरी कार्यालय मोरङका प्रवक्ता डिएसपी टिका कार्कीले जानकारी दिएका छन् ।
यता पीडक यादवले विरामीको नाटक मंचन गरी अहिले मोरङ सहकारी हस्पिटलमा उपचार सुरु गरेका छन् । नर्स र यादव विगत ७ बर्षदेखी लिभिङ रिलेसनमा रहेको बताइन्छ ।
दुवैको चिनजान २०७० सालमा भएको थियो । इनरुवाको एक हस्पिटलमा काम गर्ने क्रममा यादव र नर्सको चिनजान भएको थियोे ।
यादव विवाहीत हुन् । नर्स अविवाहीत हुन् । यादवले धाक–धम्की दिदै पटक–पटक बलात्कार गरेको पीडित भनिएकी नर्सको आरोप छ ।
