विराटनगर,११ जेठ ।
सत्ता गठबन्धनको ठूलो दल एमालेका अध्यक्ष केपी शर्मा ओलीले एकजना मिडिया मालिक पक्राउ पर्दैमा डेमोक्रेसि नै खतरामा पर्यो भन्नु गलत हुने धारण व्यक्त गरेका छन् । कान्तिपुर मिडिया ग्रुपका अध्यक्ष कैलाश सिरोहिया पक्राउ प्रकरणलाई उनले अदालती प्रक्रिया भएको र यसलाई कुप्रचार गर्न आवश्यक नभएको बताए ।
बिहीबार झापा आइपुगेका ओलीले भने ‘एकजना मिडिया हाउसका मानिस गिरफ्तार भए ,सही हो या गलत म त्यता जान चाहन्न। समय ठीक भयो कि भएन त्यो बेग्लै कुरा होला तर डेमोक्रेसी नै खतरा परिहाल्यो त? के अब सञ्चारका हक खोसिएकै हुन् त? यस्तो गलत व्याख्या उपयुक्त हुँदैन। जे यथार्थ हो त्यही गर्नु राम्रो हुन्छ, ओलीले अगाडि भने, ‘कोही समाउँदा मन्त्री समाउँदा, उपप्रधानमन्त्री समाउँदा अनेक हुँदाखेरी हल्लिन, कराउन, दुनियाँ गर्न नपर्ने ? अहिले डेमोक्रेसी कसरी खतरामा परिहाल्यो त ?
ओलीले लेखेको विषयमा सिरोहियालाई पक्राउ नगरिएको दाबी समेत गरे। उनले भने, ‘‘के लेखेको आरोप उनीमाथि लागेको के छ ? म त यता छु कि, के लेखेको विषयमा उनीमाथि यसरी कारवाही भयो त ? के लेखेको विषयमा गिरफ्तारी भनेको छ सरकारले ? अहिले गिरफ्तारी लेखेको विषयमा हो र ? त्यस्तो गलत व्याख्याचाहिँ उचित हुँदैन।’
