विराटनगर, साउन ४ । विराटनगर–१० स्थित अरनिको कलेजले कक्षा ११ मा भर्ना भएका नवआगन्तुक विद्यार्थीहरूका लागि बिहीबार अभिमुखीकरण कार्यक्रम आयोजना गरेको छ। कलेजले यसपटक विज्ञान र व्यवस्थापन संकायमा गरी १ हजार १ सय भन्दा बढी विद्यार्थी भर्ना लिएको छ।
कार्यक्रमका प्रमुख अतिथि नेपालका प्रख्यात उत्प्रेरक रमण भट्टराईले “सकारात्मक सोच र अध्ययन” विषयमा नवआगन्तुक विद्यार्थीहरूलाई प्रशिक्षण प्रदान गरे । भट्टराईले अरनिको कोशी प्रदेशको मात्र नभई नेपालकै उत्कृष्ट कलेज भएको उल्लेख गर्दै विद्यार्थीहरूलाई कडा मेहनत र परिश्रमका साथ अध्ययन गर्न प्रोत्साहित गरे ।
अरनिको कलेजका सञ्चालक तथा प्रिन्सिपल राजेश कार्की, सञ्चालक तथा प्राध्यापक भरत दाहाल, र विज्ञान संकाय तर्फका कोर्डिनेटर विकास खनालले विद्यार्थीहरूलाई अनुशासन कायम गर्नेदेखि शैक्षिक गतिविधिको बारेमा जानकारी गराए। कार्यक्रममा अभिभावकको तर्फबाट सीएम बस्नेतले सम्बोधन गर्दै अरनिको नेपालकै उत्कृष्ट कलेज भएकोले विद्यार्थीहरूलाई कडा मेहनत र लगनशीलताका साथ अध्ययन गर्न सुझाव दिए ।
कार्यक्रममा एसईईमा ४.० जीपीए ल्याउने ६ जना विद्यार्थीहरू अन्वेशा बस्नेत, गृश्मा लुईंटेल, प्रतिभा रौनियार, सुब्रत बराल, कृतज्ञ दाहाल र अजय लिम्बुलाई प्रवेश परीक्षामा उच्च अंक हासिल गरेकोमा “राजबहादुर कुँवर–कमला कुँवर” छात्रवृत्ति पुरस्कार प्रदान समेत गरियाे।
अरनिको कलेजले विज्ञान संकाय तर्फ १ हजार भन्दा बढी विद्यार्थी भर्ना लिएको जनाएको छ। साउन ६ गतेदेखि विज्ञान संकाय तर्फको कक्षा सञ्चालन हुने कलेजले जानकारी दिएको छ।
