विराटनगर, कार्तिक १५। थारु परिकार पाइने रेष्टुरेण्ट ‘बझघरा’ विराटनगरमा संचालनमा आएको छ। मुनालपथस्थित हाइवेमा खुलेको यो रेष्टुरेण्ट कोशी प्रदेशकाे थारु परिकार पाइने पहिलो र एकमात्र रेस्टुरेन्ट हो। यतिको संरचना र लगानीमा खुलेको यो नेपालकै पहिलो थारु परिकारकाे रेस्टुरेन्ट हुनसक्ने अनुमान समेत गरिएको छ। रेष्टुरेण्टमा थारु जातिका परम्परागत परिकार घुंगी, सिप्पी, भक्का, बिगिया र उड्वा भुजा पाइन्छन्। यसका साथै माछा, हाँस, परेवा र लोकल कुखुराका परिकार पनि उपलब्ध छन्।
रेष्टुरेण्टका संचालक कुलदीप चौधरीका अनुसार सबै खानेकुरा प्लेट अथवा खाजा सेटका रूपमा उपलब्ध छन्। सिध्राको अचार यहाँको विशेष परिकार रहेको छ। खाना सटेमा विशेष प्रकारको चामल प्रयोग गरी लोकल कुखुरा, परेवा, हाँस वा खसीको मासुसँग पस्किने गरिएको छ। करिब ५ हजार स्क्वायर फिटभन्दा बढी क्षेत्रफलमा फैलिएको यस रेष्टुरेण्टमा ओपन रुफ डाइनिङ, फाइन डाइनिङ तथा गेटटुगेदर र पार्टीका लागि क्याबिनको समेत व्यवस्था गरिएको छ। थारु परिकारका अतिरिक्त कन्टिनेन्टल खानाहरू पनि उपलब्ध छन्। मोमो, चाउमिन, बर्गर, पाकौडा, आलुका फ्राइड परिकार, चिकन तथा मटनका फ्राइड, ग्रिल्ड एवं बोइल्ड परिकार समेत पाइन्छन्। रेष्टुरेण्टमा हार्ड र सफ्ट दुवै प्रकारका पेय पदार्थ उपलब्ध छन्।
