विराटनगर, फागुन २२ – अन्तर्राष्ट्रिय नारी दिवसको अवसर पारेर विराटनगरमा “गल्स अन ह्विल” प्रतियोगिता आयोजना हुने भएको छ। विराटनगर प्राइम राउन्ड टेबल-१० को आयोजनामा फागुन २४ गते साे प्रतियोगिता हुने जानकारी दिइएको छ।
बुधबार आयोजित पत्रकार सम्मेलनमा आयोजक समितिले यस पाँचौं संस्करणको प्रतियोगितामा महिलाहरूले मात्र भाग लिन पाउने बताएको छ। आयोजक समितिका अध्यक्ष भास्कर सोनीले एक स्कुटरमा दुई जनाको दरले कुल १०० स्कुटर सहभागी गराउने लक्ष्य राखिएको जानकारी दिए। सहभागीहरूलाई १,५०० रुपैयाँ दर्ता शुल्क लाग्नेछ।
प्रतियोगिता विराटनगरको विभिन्न १० स्थानमा हुनेछ, जहाँ प्रत्येक स्थानमा प्रतियोगीहरूले संकेतका आधारमा टास्कहरू पूरा गर्नुपर्नेछ। टास्क पूरा गरेपछि प्राप्त अंकका आधारमा विजेता घोषणा गरिनेछ।
सिटी प्यालेसबाट सुरु हुने यो प्रतियोगिता त्यहीँ समापन हुनेछ। प्रथम स्थान प्राप्त गर्ने टिमले ६० हजार रुपैयाँ नगदसहित विभिन्न गिफ्ट ह्याम्पर प्राप्त गर्नेछन्। त्यसैगरी दोस्रो र तेस्रो स्थान हासिल गर्नेले क्रमश: ४० हजार र २५ हजार रुपैयाँ नगद पुरस्कारका साथै अन्य उपहार प्राप्त गर्नेछन्।
आयोजक समितिका अनुसार प्रतियोगितामा मनोरञ्जनात्मक कार्यक्रमहरू पनि समावेश गरिनेछ। कार्यक्रममा राष्ट्रिय तथा स्थानीय कलाकारहरूको प्रस्तुति, फुड स्टल, फेस पेन्टिङजस्ता गतिविधिहरू रहनेछन्।
