काठमाडौं, २० असार । राष्ट्रिय स्वतन्त्र पार्टी (रास्वपा) ले भिजिट भिसा प्रकरणमा उच्चस्तरीय छानबिन आयोग बनाउनु पर्ने र छानबिनको सहजीकरणको लागि गृहमन्त्री रमेश लेखकले राजीनामा दिनुपर्ने माग कायमै राखेको छ । रास्वपाको सचिवालय बैठकमा पार्टीले लिएको अडान बारे छलफल भएको र अडान कायम राखी संसद्मा यस विषयमा भइरहेको प्रतिरोध कायम राख्ने निर्णय भएको बताइएको छ ।
त्यस्तै, रास्वपाले संसद्को राज्य व्यवस्था समितिबाट पारित भएको निजामती सेवा विधेयक ‘कुलिङ अफ पिरियड’ मा भएको छेडखानीलाई ‘संविधानले व्यवस्था गरेको संसद्को सार्वभौमिकतामाथि प्रहार’ भनेको छ ।
कानुन बनाउने विधायकी स्वतन्त्र भूमिकामा आँच आउने गरी भएको यस्तो खालको बदमासीपूर्ण छलछामको गतिविधिलाई बेवास्ता नगरी यस कार्यमा संलग्नहरूलाई छानबिन र दोषीमाथि कारबाहीको माग रास्वपाले गरेको छ ।
त्यस्तै, आगामी कार्तिक २७ गते हुने रुपन्देही क्षेत्र नम्बर–३ को उपनिर्वाचनमा रास्वपाको तर्फबाट योग्य उम्मेदवार छनोट गर्नका लागि पार्टी सचिवालय बैठकमा पेस भएको उम्मेदवार छनौट विधिमासमेत छलफल भएको थियो । बैठकमा प्राप्त सुझावहरू समेतलाई समेटेर आगामी आइतबार हुने सचिवालय बैठकमा उम्मेदवार छनौट कार्यविधि अनुमोदनको लागि प्रस्तुत गर्ने निर्णय भएको बताइएको छ ।
