विराटनगर, मंसिर ५ । चिकित्सा शिक्षा आयोगले लिएको एमबीबीएस प्रवेश परीक्षामा उत्कृष्ट नतिजाका साथ नाम निकाल्न सफल भएका आफ्ना विद्यार्थीहरूलाई विराटनगरको कान्तिपुर कलेजले सम्मान गरेको छ।
विराटनगर महानगरपालिका–१० मा अवस्थित कलेजले शुक्रबार एक विशेष कार्यक्रम आयाेजना गरी एमबीबीएस प्रवेश परीक्षामा नाम निकाल्न सफल तीन विद्यार्थी सहित वार्षिक परीक्षामा उत्कृष्ट अंक ल्याउने ४३ विद्यार्थीहरूलाई सम्मान गरेको हो।
एमबीबीएस प्रवेश परीक्षामा सम्मिलित १८ हजार परीक्षार्थीहरूमध्ये मिर्चैया नगरपालिकाका राजनारायण महतो ३९औं स्थानमा सफल भएका छन्। यसअघि कक्षा १२ को परीक्षामा नेपालकै सर्वोत्कृष्ट नतिजा ३.९६ जीपीए ल्याएका राजनारायणलाई कलेजले एक लाख रुपैयाँ नगद सहित सम्मान गरिएकाे छ।
बिराटनगरबाट पहिलो पटकमै नाम निकाल्ने एक मात्र विद्यार्थी राजनारायण सहित करुणा कुमारी शाह र प्रिन्सन श्रेष्ठलाई पनि सम्मान गरिएको थियो। राजनारायणका दाजु राजु महतो पनि अघिल्लो वर्ष एमबीबीएसमा नाम निकाल्न सफल भएका थिए।
यसैगरी कक्षा ११ र १२ को विज्ञान, व्यवस्थापन र होटल व्यवस्थापनअन्तर्गत वार्षिक परीक्षामा उत्कृष्ट अंक ल्याउने १२ जना विद्यार्थी र त्रैमासिक परीक्षामा राम्रो अंक ल्याउने १८ जना विद्यार्थीलाई पनि सम्मान गरिएको छ। साथै कलेजले उत्कृष्ट ३१ जना विद्यार्थीलाई एक लाख रुपैयाँ बराबरको छात्रवृत्ति प्रदान गर्ने घोषणा समेत गरेको छ।
