रौतहट, १० फागुन । जिल्ला प्रशासन कार्यालय रौतहटले गौर नगरपालिकामा जारी कर्फ्युलाई निरन्तरता दिएको छ। आज बिहान साढे ६ बजेदेखि साढे ८ बजेसम्म दुई घण्टाका लागि कर्फ्यु खुकुलो पारिए पनि त्यसपछि पुनः लागू गरिएको हो।
जिल्ला सुरक्षा समितिको निर्णयबमोजिम प्रमुख जिल्ला अधिकारी दिनेशसागर भुसालले अर्को सूचना जारी नहुञ्जेलसम्म कर्फ्यु कायम रहने जानकारी दिएका छन्। जिल्ला प्रशासनले नागरिकलाई शान्ति–सुरक्षा कायम राख्न सहयोग गर्न आग्रह गर्दै कर्फ्यु उल्लंघन गरेमा कानुनी कारबाही गरिने चेतावनी दिएको छ।
शनिबार बिहान गौर नगरपालिका–६ स्थित सनगडा गाउँमा मुस्लिम समुदाय नमाजका लागि प्रार्थनारत हुँदा हिन्दू समुदायले बाजा बजाएको भन्ने विषयबाट विवाद सुरु भएको थियो। उक्त विवाद झडपमा परिणत भई गौरका अन्य वडाहरूसम्म फैलिएको थियो। प्रहरीले स्थिति नियन्त्रणमा लिन हवाई फायर र अश्रुग्यासको प्रयोग गर्नुपरेको थियो। त्यसपछि प्रशासनले शनिबार दिउँसो १ बजेदेखि कर्फ्यु लगाई सेना परिचालन गरेर स्थिति नियन्त्रणमा लिएको थियो।
