काठमाडौं, फागुन ११ । राष्ट्रिय स्वतन्त्र पार्टी (रास्वपा) मकवानपुरका सभापति भरत पराजुलीले पार्टी परित्याग गर्दै आफ्नो पुरानै पार्टी नेपाली कांग्रेसमा फर्किएका छन् । ३० वर्षको राजनीतिक जीवन बिताएका पराजुलीलाई कांग्रेस सभापति गगनकुमार थापाले सर्लाहीमा पार्टी प्रवेश गराएका हुन् ।
पराजुलीले पार्टी परित्यागको कारण खुलाउँदै भने, “रास्वपाले देश बनाउला जस्तो लागेको थियो, तर पछिल्लो समय रास्वपामा समेत विवादहरू बढ्न थालेपछि कांग्रेस नै ठिक लागेर फर्किएको हुँ।”
रास्वपा पछिल्लो समय प्रि–इलेक्सनको नाममा उम्मेदवारहरूसँग २५ हजार उठाएको, आफ्नो र आसपासकालाई टिकट वितरण गरेको तथा हिन्दु धर्मलाई प्रवर्द्धन नगरेको लगायतका विवादमा मुछिएको छ । यसका अतिरिक्त बालेनले आफ्नै मतदातालाई धक्कामुक्का र गालीगलौच गर्दै अभद्र व्यवहार गरेको विषयले जनता सशंकित छन् । त्यसबाहेक बालबालिकालाई उक्साएर देश जलाउन लगाएको भन्ने गम्भीर आरोप पनि रास्वपामाथि छ ।
यसका साथै, आगामी २१ फागुनको प्रतिनिधिसभा उपनिर्वाचनमा उम्मेदवारी माग गर्न काठमाडौं पुगेका पराजुलीलाई पार्टीले टिकट नदिएपछि उनी असन्तुष्ट बनेका थिए । उनकै गाउँपालिकाका २५ वर्षीय प्रशान्त उप्रेतीले टिकट पाएपछि पराजुली रित्तै फर्किएका थिए ।
