विराटनगर, वैशाख १४ । विराटनगर वरपरका बोतल पानी व्यवसायीले पानीको मूल्यमा कार्टेलिङ गरेका छन्। कार्टेलिङ गरेर उनीहरुले जारको मूल्य दुई सय प्रतिशतले बढाएका छन्। यसअघि सामान्यतः खुद्रामा ४० रुपैयाँमा पाइँदै आएको पानी अहिले एक्कासि प्रतिजार ८० रुपैयाँ पुर्याइएको छ। यस विषयमा उत्पादकहरूसँग कुराकानी गर्दा उनीहरूले दुईवटा मुख्य कारण देखाएका छन्। पहिलो, पेट्रोलका कारण मूल्यवृद्धि भइरहेकोले उत्पादकहरूले पनि मूल्य बढाएको बताएका छन्। र दोस्रो, बजारमा जारको पानीको कुनै निश्चित मूल्य नभएकोले मूल्यमा एकरूपता कायम गरेको बताएका छन्।
तर विभिन्न स्रोतहरूबाट पत्ता लगाउँदा उत्पादकहरूले एक गोप्य बैठक गरी जारको खुद्रा मूल्य ८० रुपैयाँ पुर्याउने निर्णय गरेको खुल्न आएको छ। स्रोतका अनुसार हाल पेट्रोलियमको बहाना पारेर मूल्य दोब्बर बनाउँदा कसैले पनि आवाज उठाउन नसक्ने बैठकको निष्कर्ष समेत थियो। बोतल पानी बनाउने गोमारानी उद्योगद्वारा उत्पादित निकिगङ्गाको एक कर्मचारीका अनुसार जारको पानी ६० रुपैयाँभन्दा तल होलसेलमा समेत विक्री गर्न नपाइने पानी उद्योगका सञ्चालकबीच सहमति भएको बताए। यदि कसैले सो नियम तोडेमा २५ हजार रुपैयाँदेखि १ लाख रुपैयाँसम्म जरिवाना हुने उनको भनाइ थियो।
विशेषगरी पानीजस्तो अत्यावश्यक वस्तुमा कार्टेलिङ गरी कृत्रिम मूल्यवृद्धि गरे कालोबजारी ऐन, प्रतिस्पर्धा ऐन र उपभोक्ता संरक्षण ऐन आकर्षित हुने देखिन्छ। सो ऐन अनुसार पानीमा कार्टेलिङ गरे ५ वर्षसम्म कैद र ५ लाखसम्म जरिवाना हुने व्यवस्था छ। तर सो विषयमा हालसम्म जिल्ला प्रशासन, वाणिज्य तथा नगरपालिकाले अनुगमन गरेको छैन।
