काठमाडौं, जेठ ११। नेपाल बार एसोसिएसनका अध्यक्ष प्रा.डा. विजयप्रसाद मिश्रले सर्वोच्च अदालतमा लागू गोलाप्रथा हटाउने तयारीको विरोध गरेका छन् ।
काठमाडौंमा आयोजित एक कार्यक्रममा बोल्दै उनले गोलाप्रथाको सट्टा प्रधानन्यायाधीशले पेशी तोक्ने व्यवस्था आए न्यायपालिका राजनीतिक प्रभावमा पर्ने चेतावनी दिए । यस्तो व्यवस्था आयो भने सशक्त आन्दोलन गर्ने उनको घोषणा छ ।
मिश्रले प्रधानन्यायाधीश नियुक्तिमा पनि प्रधानमन्त्रीको रोजाइमा व्यक्ति चयन हुने प्रवृत्ति विकास भएको आरोप लगाए । उनले सरकारको आलोचना गर्नेलाई ‘झोले’ भन्ने र हजारौँ मानिस परिचालन गरेर दबाब दिने गरिएको टिप्पणी गरे ।
न्यायपालिकाले गम्भीर संकट सामना गरिरहेको बताउँदै उनले कानून व्यवसायीहरूलाई विवेक नगुमाउन आग्रह गरे ।
