२५ जेठ, काठमाडौं । राष्ट्रिय स्वतन्त्र पार्टी (रास्वपा)का सभापति रवि लामिछानेले आह्वान गरेको सर्वदलीय बैठक सिंहदरबारमा सुरु भएको छ । तर संसदमा प्रतिनिधित्व गर्ने कुनै पनि ठूलो दलका शीर्ष नेता बैठकमा उपस्थित नभएपछि राजनीतिक जानकारहरूले यसलाई अघोषित बहिष्कारको संज्ञा दिएका छन् ।
बैठकमा प्रतिनिधिसभा र राष्ट्रियसभामा प्रतिनिधित्व गर्ने सबै दलका पार्टी अध्यक्ष तथा सभापतिसहित दुई-दुई जनालाई आमन्त्रण गरिएको थियो । तथापि नेपाली कांग्रेस, नेकपा एमाले र नेकपाले आफ्ना पार्टी प्रमुखलाई बैठकमा पठाएनन् । श्रम संस्कृति पार्टीले भने बैठकको औपचारिक बहिष्कार नै घोषणा गरेको छ ।
राप्रपाका अध्यक्ष राजेन्द्र लिङ्देन बैठकमा सहभागी भए पनि संसदीय शक्ति सन्तुलनमा निर्णायक भूमिका खेल्ने दलहरूका शीर्ष नेताको अनुपस्थितिले बैठकको प्रभावकारितामाथि प्रश्न उठेको छ ।
