कात्तिक १७, विराटनगर ।
तपाईं घर किन्ने वा आफ्नै घरमा बस्ने योजना बनाउँदै हुनुहुन्छ भने अब बैंकले तपाईंलाई सहयोग गर्ने भएको छ ।
नेपाल राष्ट्र बैंकले एकीकृत निर्देशिका २०७६ जारी गर्दै आवास वा घर कर्जा सम्बन्धी नयाँ योजना मार्फत सो सहयोग गर्ने भएको हो । बैंकले घर कर्जा सम्बन्धी नयाँ योजना अन्र्तगत ३० प्रतिशत रकम बुझाएर ७० प्रतिशतसम्मको घर कर्जा लिन सकिने व्यवस्था गरेको छ ।
यसअघि काठमाडौं उपत्यकामा घर किन्दा कम्तिमा ५० प्रतिशत रकम सुरुमै तिर्नुपर्थ्यो । बाँकी पैसा बैंकले ऋण दिन्थ्यो , र ऋणीले किस्ताबन्दीमा श्रृण स्वरुप बैंकबाट लिएको रकम चुक्ता गर्नुपर्थ्यो । तर उक्त निर्देशिका अनुसार अब देशैभरिसुरुमा ३० प्रतिशत रकम तिरेपछि घर किन्न सकिने छ । बाँकी रहेको ७० प्रतिशत रकम भुक्तानी गर्न भने बैंकले ऋण दिन्छ । त्यसलाई मासिक रुपमा किस्ताबन्दीमा तिर्दै जान सकिने छ ।
निर्देशिकामा उल्लेख भएअनुसार आवास वा घर कर्जा सुविधा पाउनको लागि अन्य केही मापदण्ड पुरा गर्नुपर्छ । एकपटक ऋण लिएर घर खरिद गरिसकेको व्यक्तिले यो योजनाको लाभ उठाउन पाउने छैनन् । पहिलो पटक घर किन्न निवेदन दिएका ऋणीले मात्रै यो सुविधा पाउने छन् ।
यो ऋण सुविधा पाउन घर ३ हजार वर्गफिट सम्मको क्षेत्रफलमा बनेको हुनुपर्नेछ । त्यो भन्दा ठुलो क्षेत्रफल ओगटेको घरले पनि यो सुविधा पाउँदैनन । यस्तो ऋण पाउनको लागि ऋणीले मासिक रुपमा कर्जा भुक्तान गर्ने स्रोत अनिवार्य रुपमा देखाउनै पर्छ । जुन स्रोत बैंकले विश्वास गर्ने खालको हुनुपर्दछ । यस्तो आम्दानीको स्रोतको रुपमा घर भाडामा लगाएर आएको आम्दानी भने मान्य नहुने निर्देशिकामा प्रष्ट उल्लेख गरिएको छ । यस्तै, ऋणीले बैंक तथा वित्तीय संस्थाको समझदारीमा ऋणको अवधिभरी ऋणको ब्याजदर स्थिर पनि राख्न सक्नेछन ।
पछिल्लो समय घर कर्जासम्बन्धी कडा व्यवस्थाका कारण घरजग्गाको कारोबार कम हुँदै आएको थियो । त्यसैले राष्ट्रले बैंकले भने घरजग्गाको कारोबारलाई थप प्रर्वद्धन गर्न घर कर्जासम्बन्धी खुकुलो नीति लिएको देखिन्छ ।
