विराटनगर, फागुन १
भारतको बथनाहादेखि मोरङको कटहरीसम्मको बन्ने भनीएको पूर्वाेत्तर सीमान्त रेलमार्ग अबको दुई वर्षभित्रमा सम्पन्न हुने भएको छ ।
भारत सरकारको सहयोगमा बन्न लागेको उक्त रेलवे लाइन सन् २०२२ सम्ममा सम्पन्न भैसक्ने पूर्वाेत्तर सीमान्त रेल मण्डलका प्रबन्धक रविन्द्रकुमार बर्माले जानकारी दिएका छन् ।
भारू ३ अर्ब ७६ करोडको लागतमा बन्न लागेको उक्त रेलवे लाइन १८ दशमलव ६ किलोमिटर लामो रहेको छ । सो रेलखण्डमा पर्ने भारतको बथनाहादेखि नेपालको सिमा क्षेत्र बुधनगरसम्मको काम पूरा भएर रेल सञ्चालनको परीक्षण समेत भईसकेको छ ।
मुआब्जा विवादका कारण नेपालमा पर्ने बुधनगरदेखि उक्ततर्फको साढे १० किलोमिटरको काम भने सम्पन्न हुनसकिरहेको थिएन । मुुआब्जाको विषयमा अदालतमा समेत मुद्दा चलिरहेकाले अदालतको आदेश अनुसार पछि–भरपाई गर्ने गरी कामलाई अघि बढाईएको मोरङका सिडियो कोशहरि निरौलाले बताए ।
उक्त रेल सेवा सुचारु भए पछी शुरूमा माल सामान ओसारपसारमा प्रयोग गर्ने र पछि यात्रु सेवा विस्तार गर्ने योजना रहेको छ । सो रेल सेवाको अन्तिम स्टेशन कटहरीमा हुनेछ ।
