निरज बस्नेत
झापा, पुष २२
पूर्वको झापामा प्रत्येक वर्ष लाग्दै आएको माघे सङ्क्रान्ति मेलाको तयारी शुरु भएको छ । यही पुष २८ गतेबाट माईमेला शुरु गरि ५ दिनसम्म गरी माघ २ गते सम्म चल्नेछ ।
पूर्वको पवित्र स्थल कन्काई नदीको दुवै किनारमा मेला बर्षेनी लाग्ने गरेको पाइन्छ । माघ १ गते मकर स्नान गर्नेको यहाँ विशेष घूइँचो लाग्नेछ । माई मेलामा आएर मकर नुहाई पूजा आराधना गरेमा मनोकांक्षा पुरा हुने धार्मिक विश्वास रहेको पाइन्छ ।
कन्काई नदीलाई भगवती माईदेवीको रुपमा मान्ने प्रचलन रहँदै आएको छ । भगवती माईदेवीको स्नान गरेपछि मनोकांक्षा पूरा हुने स्थानीय सिता भण्डारी बताँउछिन् ।
यहाँ कन्काईमा माघी मेलामा विशेषगरी माघे सङ्क्रान्तिको दिन अर्थात १ माघमा नेपालका विभिन्न ठाउँबाट भक्तजनको विशेष भीड त लाग्छ नै यसका साथै छिमेकी मुलुक भारत, भुटानबाट समेत भक्तजनहरुको आइरो लाग्ने गरेको अर्की स्थानीय सविता खड्का बताउँछिन् ।
माईमेलामा संस्कृति झल्काउँने टाइपका सांस्कृतिक कार्यक्रमहरु आयोजना हुने गरेकका छन् । मेलामा रोटेपिङ, खेल तमासा, ब्रेकडान्स, बटरफ्लाई, कोलम्वस, आदी पनि समावेश रहनेछन् ।
माईमेलामा कम्तिमा २ लाख आगन्तुक आउने अनुमान सर्वसाधारण विनीता गिरीको प्रक्षेपण छ । यसदिनमा सूर्य उत्तरायण भएका बेला गरिएको स्नान, दान, जपतप, तीर्थ, व्रतलाई उत्तम मानिएको धार्मिक क्षेत्रका जानकारहरु बताउँछन् ।
मकर स्नानबाट शरीरमा भएका विभिन्न रोगहरुको समाधान हुने तथा मानव जीवनमा गरेको पाप र भुलहरु नष्ट भएर जाने जनविश्वास रहिआएको पाइन्छ ।
