विराटनगर, असार ५
विराटनगरको भाटभटेनी सुपर मार्केटको पाँचौं तल्लामा क्यूएफएक्स मल्टिप्लेक्स संचालित छ । यहाँ टिकटको रेट रु. ३०० देखी रु. ६०० सम्म कायम गरिएको छ ।
प्रायः मल्टिप्लेक्स सिनेमाघरहरुको टिकटको दर देशभर एउटैनै राखिदैआएको पाइन्छ । कहीँकतै तलमाथि हुनसक्छ । हप्ताको दुईदिन चाँही रु. १५० अल शो, मा टिकट दर रहेको छ ।
यो विराटनगरको हकमा हो । अन्यत्रको अवस्थामा बार भने फरक हुनसक्ला । यही दर, सेन्ट्रल मल्टिप्लेक्स अनि सिटी सिनेमामा पनि यथावत छ । विराटनगरको मेनरोडमा सेन्ट्रल मल्टिप्लेक्स छ भने तिनपैनीमा सिटी सिनेमा मल्टिप्लेक्स रहेको छ ।
लगानी गरेअनुसारको टिकट दर कायम गरिएको हल संचालकहरुको दावी रहँदै आएको छ । यता आम दर्शक चाँही टिकट दर मँहगो भयो भन्छन् ।
टिकट दर त फगत प्रसंग बाहिरको कुरा भयो । उठान गर्न चाँही के खोजिएको भने, मल्टिप्लेक्समा खानेकुराको रेट किन महँगो त ?
यस विषयमा हल संचालकहरुको प्रतिक्रिया खरो छ । लगानी करोडौं पर्छ । लगानी अनुसारको दाम त पर्छ । यस्तो प्रतिक्रिया हल संचालकहरुको छ ।
यता आम दर्शक चाहीँ क्रोधित हुदै भन्छन्ः समोसा एक पिसको रु ५० अनि पानीको ५० यसरी लिन पाइन्छ ? बासी समोसालाई ओभनमा हाल्यो अनि तातो पारेर बेच्यो । यसमा पनि त शुद्दता हुदैन ।
रु १० को एक लिटर पानीको बोतलको रु ५० यो कहाँसम्मको न्यायोचित हो ? यससम्वन्धमा सम्वन्धित स्थानीय सरकार मौन देखिन्छ । यो हाम्रो मामला होइन भन्दै पन्छिने गरेको पाइन्छ । कतिपयको प्रतिक्रिया भने अलिक फरक छ ।
सिनेमा हेर्न जानु भनेको सौखको विषय हो । कुनै हलवालाले कर गरेर , बाध्यता पारेर , हात समातेर हलसम्म त घिसारेर ल्याउँदैन । यसमा व्यक्ति स्वयंको इच्छामा भरपर्ने कुरा हो ।
सवैको आ–आफ्नै तर्क आफ्नो ठाउँमा जायज होला । तरपनि कुनैपनि वस्तुको मूल्य कतिसम्म लिने भन्ने पनि उसको या भनौ त्यो संस्थाको नैतिकतासँग पनि जोडिने विषय हुनजान्छ । व्यापार खाली मुनाफाकै लागि मात्र त गरिन्न ।
यसमा पनि नीति–नियम भन्ने त हुन्छ । वस्तु विक्रि गर्दा धेरैमा २० प्रतिशतसम्म नाफा लिनुलाई स्वभाविक मान्न सकिएला । तर, रु १० को सामान रु ५० सम्म बेच्दा नाफा कति ?
