विर्तामोड, असोज ३०। नेपालकै सबैभन्दा ठूलो हाट बजार मानिने फुलबारी मेला यस वर्ष पनि कोजाग्रत पूर्णिमाको दिन कार्तिक १ गते झापाको फुलबारीमा लाग्दैछ। वर्षमा एक पटक मात्र लाग्ने यो विशेष हाट बजार शैलीको मेलाको तयारी अन्तिम चरणमा पुगेको छ।
मेलाका लागि हालसम्म जुलेबीका ६० वटा स्टल बुक भइसकेका छन् भने मेला शुरु हुने पूर्वसन्ध्यासम्ममा जुलेबीका स्टलको संख्या १०० भन्दा बढी पुग्ने आयोजकको अनुमान छ। त्यसैगरी चटपटेका ६० वटा, फास्टफुडका ४० वटा र खेलौनाका २५ वटा स्टल पनि बुक भइसकेका छन्। कुल मिलाएर यस वर्षको मेलामा ४०० भन्दा बढी व्यापारीले सहभागिता जनाउने अनुमान गरिएको छ।
फुलबारी माविको खुला दश बिघा क्षेत्रफलमा लाग्ने यो ऐतिहासिक मेलाको इतिहास ५-६ दशक पुरानो छ। गाउँले परिवेशमा आयोजना हुने भए पनि यसको लोकप्रियता र महत्व पछिल्लो समय उल्लेख्य रूपमा बढेको छ। मेलामा स्थानीय संस्कृतिक खानपान, लुगाफाटा र परम्परागत प्रदर्शनीका साथै बालबालिकाका लागि विशेष मनोरञ्जनका साधनहरू रहनेछन्। रोटीपिङ र झुलुङ्गा जस्ता पारम्परिक खेलहरूले मेलालाई थप रोमाञ्चक बनाउने छन्।मेलाको मुख्य आकर्षणको रूपमा रहेको संथाल नृत्यमा नेपालका साथै भारतका विभिन्न राज्यहरूबाट कलाकारहरूको सहभागिता रहने छ। उत्कृष्ट प्रदर्शन गर्ने समूहलाई मेला समितिले नगद पुरस्कारसहित सम्मान गर्ने कार्यक्रम रहेको छ।
मेला प्रचार प्रसार विभागका संयोजक खेम पौडेलका अनुसार यस वर्ष १ लाखभन्दा बढी दर्शकहरूको उपस्थिति हुने अपेक्षा गरिएको छ। एक दिने यस मेलामा ३ करोड रुपैयाँसम्मको कारोबार हुने अनुमान छ। आदिवासी समुदायबाट शुरु भएको यो मेला अहिले विभिन्न जातजाति र धर्मका मानिसहरूको मिलनथलो बन्न पुगेको छ। यसले नेपालको बहुसांस्कृतिक पहिचानलाई समेत प्रतिबिम्बित गर्ने गरेको छ।
