विराटनगर, कार्तिक १४ । यस वर्षको भाइटीकाको शुभसाइत बिहान ११ बजेर ३७ मिनेटमा रहेको छ। नेपाल पञ्चाङ्ग निर्णायक समितिले विज्ञप्ती जारी गरी सर्वसाधरणलाई पर्व र साईतवारे जानकारी गराएकाे छ। यसैगरी, पश्चिम मोहडा गरेर भाइटीका लगाउनुपर्ने पनि समितिले जनाएको छ। नेवार समुदायले मनाउने किजापूजा पनि त्यसै दिन गर्नुपर्ने समेत जनाइएको छ।
नेपालीको ठूलो चाडमध्यकाे तिहार कात्तिक १३ गते मंगलबारदेखि सुरु भएकाे छ। मंगलबार धनत्रयोदशी (धनतेरस) पर्व मनाईएकाेछ। यमदीपदान भने कात्तिक १४ गतेदेखि बुधबार परेको छ। कागतिहार पनि बुधवार नै मनाउनुपर्ने समितिले जनाएको छ। आयुर्वेदका प्रवर्तक धन्वन्तरी जयन्ती पनि बुधबार नै मनाइन्छ।
कुकुर तिहार, नरक चतुर्दशी, दीपमालिका र लक्ष्मीपूजा कात्तिक १५ गते बिहीबार मनाउनुपर्छ। कात्तिक १६ गते शुक्रबार औंशी परेको छ। त्यस दिन भने तिहारको कुनै पर्व नपरेको समितिले सोमबार जारी गरेको विज्ञप्तिमा उल्लेख छ। कात्तिक १७ गते शनिबार गाईगोरु पूजा, गोवर्धन पूजा, बलि पूजा, हलीतिहार, म्हपूजा र नेपाल संवत् ११४५ प्रारम्भ पनि परेको छ।
