कार्तिक २९, विराटनगर । अपाङ्गता भएका महिलाहरुको महासंघ नेपाल (FWDN) ले बुधबार बिराटनगरमा एक दिने प्रदेशस्तरीय कार्यशाला गोष्ठी सम्पन्न गरेको छ। “अपाङ्गता भएका महिला तथा किशोरीको सवालहरुको पहिचान गरी विविधताको सम्मान गरौँ” भन्ने नाराका साथ कार्यक्रम आयोजना गरिएको हो।
अपाङ्गता अधिकार कोषको सहयोगमा आयोजित कार्यक्रममा विभिन्न संघसंस्थाहरूको सहभागिता रहेको थियो। आदिवासी जनजाति अपाङ्ग महिला संघ, दलित अपाङ्गता भएका व्यक्तिहरुको संघ, नेत्रहीन महिला संघ लगायत संस्थाहरू सहआयोजक रहेका थिए।
महासंघकी अध्यक्ष निर्मला धितालका अनुसार कार्यक्रममा १३ जिल्लाका ३५ जना सहभागी थिए। उनीहरूमा शारीरिक, बौद्धिक, दृष्टि, सुनाइ तथा बोलाई र मनोसामाजिक अपाङ्गता भएका महिलाहरू सामेल थिए।
राष्ट्रिय बहिरा महासंघ नेपालका महासचिव सिताराम ओझाको स्वागत मन्तव्यबाट सुरु भएको कार्यक्रममा पाँच समूहमा विभाजन गरी छलफल गराइएको थियो। अध्यक्ष धितालले सिड महासन्धिको बारेमा जानकारी गराउँदै छायाँ प्रतिवेदन र यसको प्रक्रियाबारे सहजीकरण गरेकी थिइन्।
कार्यक्रमको समापनमा राष्ट्रिय अपाङ्ग महासंघ नेपाल, कोशी प्रदेशकी पूर्व अध्यक्ष तथा अपाङ्गता अभियानकर्मी पार्वता श्रेष्ठले आफ्ना सवालहरू उठाउन सक्नुपर्ने र कमजोरीलाई पन्छ्याएर अघि बढ्नुपर्ने कुरामा जोड दिइन्।
