विराटनगर, पुष १६ । इटहरी उपमहानगरपालिका कार्यालय अगाडि आज बिहान फेला परेको कुकर बम नेपाली सेनाको टोलीले निष्क्रिय पारेको छ। कार्यालय अगाडिको घुम्ती पसल नजिक कालो झोलाभित्र प्लास्टिकको झोलामा राखिएको कुकर बमबारे अज्ञात समूहले प्रहरीलाई खबर गरेका थिए।
बम निष्क्रिय पार्न नेपाली सेनाको विशेष टोली, तालिम प्राप्त कुकुर र नेपाल प्रहरी परिचालित भएका थिए। सोही समूहले आफूलाई राजावादी भन्दै भोटेपुल, बुढी खोला लगायत विभिन्न स्थानमा पनि बम राखेको जानकारी सुनसरी प्रहरी कन्ट्रोल रुमलाई गराएको थियो। अन्य स्थानमा पनि नेपाली सेनाको टोली बम निष्क्रिय पार्न खटिएको सुनसरी प्रहरीले जनाएको छ।
