०८ फाल्गुण २०८१, बिहिबार
20-02-2025 , Thu
Gold Silver Price (7 Fagun 2081, WED)
Fine Gold 1 Tola NRs. 171000
Silver 1 Tola Nrs. 2000

विराट गोल्डकपको आठौं संस्करणमा २२ लाख बढी घाटा

Logo
जनचर्चा संवाददाता प्रकाशित सोमबार, पुष २९, २०८१

विराटनगर,२९ पुस /  प्रतियोगिता भएको नौ महिनापछि विराट गोल्डकपले हिसाबकिताब सार्वजनिक गरिएको छ । विराटनगरको प्रतिष्ठा एवं इज्जतसँग जोडिएको विराट गोल्डकप फुटबल प्रतियोगिता लगातार घाटामा गइरहेको हो ।

लगातार दुईवटा प्रतियोगिता नोक्सानमा गएको हो । गोल्डकपको सातौं र आठौं संस्करणले ठूलो नोक्सानी बेहोर्नु परेको छ । विराटनगरमा ९ महिनाअघि सम्पन्न भएको ऐतिहासिक विराट गोल्डकपको आठौं संस्करणमा २२ लाख बढी घाटा भएको विवरण आइतबार सार्वजनिक गरिएको छ ।

आठौं संस्करण २०८० चैत १५ गते सुरू भएर २४ गते सम्पन्न भएको थियो । प्रतियोगिता सम्पन्न भएको नौ महिनापछि सार्वजनिक आयव्यय विवरण अनुसार गोल्डकपबाट २२ लाख ६२ हजार ८ सय ८ रूपैयाँ नोक्सानी भएको छ ।

आयोजक विराट गोल्डकप फुटबल ट्रष्टले विराटनगरमा पत्रकार सम्मेलन गरेर गोल्डकपमा ८२ लाख ६० हजार ८ सय ३५ रूपैयाँ आम्दानी भएको र एक करोड पाँच लाख २३ हजार ६ सय ४३ रूपैयाँ खर्च भएको जानकारी दिएको हो ।

ट्रष्टका अनुसार कोशी प्रदेश सरकार र राष्ट्रिय खेलकुद परिषद् (राखेप)ले असहयोग गरेकाकारण गोल्डकप घाटामा गएको दाबी गरेको छ । प्रदेश सरकार र राखेपले कबोल गरेको रकम उपलब्ध नगराउँदा गोल्डकपले नोक्सान बेहोरेको ट्रष्टका अध्यक्ष किशोरबहादुर शाहीले बताए ।

उनले भने, ‘गोल्डकप गराउँदाको समयमा तत्कालीन मुख्यमन्त्री केदार कार्कीले २५ लाख रुपैयाँ बजेट राखिदिनुभएको थियो । तर, उहाँ सरकारबाट बाहिरिएपछि नयाँ मुख्यमन्त्री हिक्मतकुमार कार्कीले पनि रकम उपलब्ध गराउने प्रतिवद्धता जनाउनुभएको थियो । तर, प्रदेश सरकारले रकम उपलब्ध गराएन । खेलकुदलाई पूरै बेवास्ता गर्यो ।’

शाहीले प्रदेश सरकारबाट २५ लाख र राखेपबाट पाँच लाख रुपैयाँ उपलब्ध गराउने आश्वासनपछि गोल्डकप सम्पन्न गरिएको बताए ।

‘सरकारले २५ लाख मात्रै दिएको भए गोल्डकप नाफामा जाने थियो । यस विषयमा हामीले प्रदेश खेलकुद विकास बोर्ड र सामाजिक विकास मन्त्रालयलगायत सबैतिर पटकपटक भन्यौं । तर, कतैबाट सहजीकरण भएन,’ उनी भन्छन्, ‘सरकारले इटहरी गोल्डकप, झापा गोल्डकप र धरानमा हुने बुढासुब्बा गोल्डकपलाई समेत रकम दिएन । यसले पनि सरकार खेलकुदप्रति जिम्मेवारी छैन भन्ने प्रष्ट हुन्छ । अझैसम्म खेलकुद सरकारकै बेवास्ताको सिकार भइरहेको छ ।’

ट्रष्टका महासचिव विनेश बस्नेत सरकार र खेलकुद निकायकै कारण गोल्डकपमा ठूलो नोक्सानी बेहोर्नु परेको बताउँछन् । कबोल गरेको रकम उपलब्ध नहुँदा बजारमा समेत बाँकी रकम तिर्न समस्या भइरहेको उनको भनाइ छ ।

गोल्डकपमा विभिन्न प्रायोजकबाट ३५ लाख ९५ हजार, टिकट बिक्रीबाट ३५ लाख २० हजार र विराटनगर महानगरपालिकाबाट ११ लाख ४५ हजार रुपैयाँ आम्दानी भएको उनले बताए । उनका अनुसार गोल्डकपमा पुरस्कार, मेडल तथा ट्रफीतर्फ २० लाख ८७ हजार, क्लबको यातायात खर्चमा १३ लाख, फ्लेक्स बोर्डतर्फ १२ लाख ८५ हजार रुपैयाँ खर्च भएको छ ।

विगतमा ट्रष्टको कार्यसमितिले संयोजक राखेर प्रतियोगिता गर्दै आएको थियो । तर, आठौं संस्करण भने ट्रष्ट आफैंले आयोजना गरेको हो । प्रतियोगिता भव्य र सभ्य रूपमा सम्पन्न भएपनि घाटा बेहोर्नु परेको ट्रष्टका कोषाध्यक्ष अनुज बानियाँले बताए ।

प्रतियोगितामा ३ विदेशीसहित १० वटा टिमको सहभागिता रहेको थियो । जसमा भारतको २ र भुटानको १ वटा तथा नेपालबाट विभागीयसहित ७ टिमको सहभागिता रहेको प्रतियोगिताको उपाधि मच्छिन्द्र फुटबल क्लबले जितेको थियो ।

प्रतियोगिताको विजेताले ११ लाख र उपविजेताले ५ लाख ५० हजार नगद पुरस्कार पाएका थिए । त्योबाहेक उत्कृष्ट प्रशिक्षक, गोलरक्षक र सर्वाधिक गोलकर्तालाई २१ हजार रूपैयाँका दरले दिइएको कोषाध्यक्ष बानियाँले बताए ।

उनका अनुसार दैनिक उत्कृष्ट हुने खेलाडीलाई ११ हजार रूपैयाँका दरले र सर्वोत्कृष्ट खेलाडीलाई मोटरसाइकल पुरस्कार प्रदान गरिएको थियो ।

आर्थिक मन्दीका कारण औद्योगिक एवं व्यापारिक क्षेत्र समस्यामा परेकाले स्रोत जुटाउन समस्या भएको बानिया बताउँछन् ।

‘आर्थिक मन्दीको असर सबै क्षेत्रमा परेका कारण सहयोग जुटाउन कठिन भयो । तर, विराट गोल्डकपको पहिचानलाई जोगाइराख्न प्रतियोगिता संचालन गर्नैपर्ने बाध्यता थियो । त्यहाँमाथि सरकार र राखेपबाट सहयोग भएन । विभिन्न चुनौतीको सामना गर्दै प्रतियोगिता सफलतापूर्वक सम्पन्न गरियो,’ उनले भने ।

गोल्डकपको सातौं संस्करणसमेत नोक्सानमा गएको थियो । त्यतिबेला ८७ लाख रूपैयाँ बराबर घाटा भएको हो । लगातार घाटा बेहोर्ने अवस्था सिर्जना हुनु विराट गोल्डकपका लागि चिन्ताको विषय भएको ट्रष्टले जनाएको छ ।

लगातारको घाटासँग जोडेर गोल्डकपको भविष्यका बारेमा अनेक टिप्पणी एवं चर्चासमेत भइरहेका छन् । अध्यक्ष शाहीका अनुसार ट्रष्टले गोल्डकपको नवौं संस्करण आयोजनाका लागि अखिल नेपाल फुटबल संघ (एन्फा)बाट आगामी फागुन २१ गतेको समय पाएको छ ।

खेलकुदलाई साथ दिनुपर्ने र सहयोग गर्नुपर्ने निकायबाटै बेवास्ता भइरहेकाले एन्फाबाट पाएको समयमा गोल्डकपलाई कसरी सम्पन्न गर्ने भन्ने विषयमा छलफल सुरू भएकोसमेत उनले बताए ।

कमेन्ट गर्नुहोस्
सम्बन्धित

काठमाडौं ,७ फाल्गुन । पूर्वराजा ज्ञानेन्द्र शाहले राष्ट्र जोगाउन, राष्ट्रिय एकता कायम राख्न, देशको समृद्धि र उन्नतिका निमित्त साथ दिन सबै देशवासीहरुलाई आह्वान गरेका छन् । प्रजातन्त्र दिवसको पूर्वसन्ध्यामा एक भिडिओ सन्देश जारी गर्दै पूर्वराजा शाहले भनेका छन्, ‘राष्ट्र रक्षाको निम्ति सबैको अनुशासन र इमान्दार प्रयत्न हुनु पर्दछ । हामीले पहिले पनि राष्ट्रिय समस्या सुल्झियोस भनेर […]

विराटनगर ,६ फाल्गुन ।  कोशी प्रदेशको राजधानी विराटनगरमा आयोजना गर्न लागिएको नवौं संस्करणको विराट गोल्डकप फुटबल प्रतियोगिताको तयारी तीव्र पारिएको छ । प्रतियोगितामा दुई वटा भारतीयसहित १० वटा टिम सहभागी हुने पक्का भएको छ । विराटनगरमा सोमबार पत्रकार सम्मेलनमार्फत भारतका दुई र नेपालका विभागीयसहित आठ वटा गरी प्रतियोगितामा १० वटा टिमको सहभागिता रहने जानकारी दिइयो […]

विराटनगर, ६ फाल्गुन । नेकपा (माओवादी केन्द्र) कोशी प्रदेश समितिले आगामी फागुन १२ गतेदेखि सुरु हुने ‘जनतासँग माओवादी, तराई–मधेश जनजनगरण अभियान’का क्रममा अन्य पार्टीका हजारौं कार्यकर्ता भित्र्याउने दाबी गरेको छ । कोशी प्रदेश परिषद बैठकको निर्णय सार्वजनिक गर्न सोमबार विराटनगरमा आयोजित पत्रकार सम्मेलन गर्दै माओवादी केन्द्र कोशी प्रदेशले यस्तो दाबी गरेको हो । उक्त अभियान […]