विराटनगर, १० माघ | कोशी प्रदेश सरकारका सामाजिक विकास मन्त्री पाँचकर्ण राईले अपाङ्गता तथा बहिरा व्यक्तिहरूको हकअधिकार संरक्षणमा पूर्ण प्रतिबद्धता व्यक्त गरेका छन्।
बुधबार सुरु भएको तीनदिने गोष्ठीमा साङ्केतिक भाषाका लागि नयाँ शब्द संकलन र निर्माणमा जोड दिइएको छ। वर्तमानमा बहिरा समुदायका लागि केवल ४ हजार शब्द उपलब्ध छन्, जबकि सबै विषयवस्तुमा संवाद गर्न ७ हजार शब्दको आवश्यकता रहेको छ।
नेपाल बहिरा महासंघका कोशी प्रदेश समितिका अध्यक्ष सीताराम ओझाले १५ जना दोभाषेको आवश्यकता रहेको र वार्षिक ७० लाख रुपैयाँ लाग्ने बताए। तर सरकारले ५० लाख रुपैयाँ मात्र विनियोजन गरेको छ।
कार्यक्रममा बहिरा शिक्षक संघ, राष्ट्रिय बहिरा क्रिकेट संघ, पत्रकार महासंघ लगायतका संघ संस्थाका प्रतिनिधिहरू सहभागी भए। गोष्ठी शुक्रबारसम्म चल्नेछ।
