काठमाडौं, असोज ०४
नयाँ बानेश्वरका व्यापार व्यवसायी संघले सबै उपभोग्य बस्तुमा मूल्यसूची अनिवार्य राख्न व्यापारीहरुलाई आह्वान गरेको छ । वाणिज्य, आपूर्ति तथा उपभोक्ता संरक्षण विभागमा भएको छलफलपछि संघले उपभोग्य बस्तुमा अनिवार्य मूल्यसूची राख्न संघमा आबद्ध सबै व्यापारी व्यवसायीलाई आह्वान गरेको हो ।
अनुगमनको नाममा व्यापारीहरुलाई अनावश्यक जरिवाना गराएको भन्दै संघका अध्यक्ष रामशरण गिरीको नेतृत्वमा व्यापारीहरुको ठुलो समुहमा छलफलका लागि बिहिवार विभाग पुगेको थियो । अनुगमन टोलीले केहिदिन अघि सम्झना गौतमको गुडविल बि फेसन र रञ्जना शर्माको एबिएस फेसन बर्डलाई मुल्य सुची नराखेको भन्दै ५० हजार जरिवाना तिर्न भनेको थियो ।
साना तिना विषयमा पहिलो पटकलाई सचेत गराउनु पर्नेमा ५० हजार रुपैयाँ जरिवाना गराएर व्यापारीहरुलाई हतोत्साहित पार्न खोजिएको संघको भनाई छ । ‘तथापी पनि व्यवसायलाई स्वस्थ र पारदर्शी बनाउने पहिलो दायित्व व्यापारीकै भएकाले ऐन कार्यान्वयनका लागि सबैलाई अपिल गरेका हौं ।’ अध्यक्ष गिरीले भने ।
मुल्य सुचिले मात्रै स्थाई समाधान नहुने र न्युनविजकीकरणले साना व्यवसायी घर न घाट को दोसाँधमा रहेको गिरी बताउँछन । नाकाबाट अनाधिकृत रुपमा भित्रिएका सामानहरुलाई रोकिनु पर्ने र भन्सार विभागले पनि न्युनबिजकीकरण लाई प्रोत्साहन गर्न नहुने उनको भनाई छ ।
संघमा आबद्ध सबै व्यवसायीलाई अनिवार्य मूल्यसूची राख्न र उपभोक्ता अधिकार संरक्षणमा सचेत रहन आग्रह गरिएको कोषाध्यक्ष रमेशमान शाक्यले जानकारी दिए । नयाँ बानेश्वर व्यापार व्यवसायी संघमा करिब ५ सय व्यापारी आबद्ध छन् ।
