काठमाडौं २६ बैशाख । राष्ट्रिय प्रजातन्त्र पार्टी (राप्रपा)का वरिष्ठ उपाध्यक्ष रवीन्द्र मिश्रमाथि राज्यले फेरि अर्को मुद्दा थपेको छ । तीनकुने घटनासँग जोडिएर यसअघि राज्यविरुद्धको कसुर र संगठित अपराध अन्तर्गत अभियोग लगाइएको मिश्रमाथि अब आपराधिक उपद्रवसमेतको मुद्दा दायर गरिएको हो ।
आज (बिहीबार) जिल्ला अदालत काठमाडौंमा म्याद थपको प्रक्रिया दौरान मिश्रमाथि नयाँ आरोप थपिएको हो । अदालतमा प्रस्तुत हुँदै मिश्रले न्यायाधीशसमक्ष आफूमाथि राज्यले पुनः “कालो टिका“ लगाएको आरोप लगाए ।
“आज ४२ औं दिन हो, राज्यले फेरि मेरो निधारमा तेस्रो कालो टिका लगायो,“ मिश्रले भने, “पहिला ४१ दिन राज्यविरुद्धको कसुर र संगठित अपराधको टिका लगाएर हिँडेँ। अब आपराधिक उपद्रवको आरोप थपिएको छ।”
उनले थपे, “यो टिका पुछ्ने अधिकार र निष्ठा यो न्यायालय र सम्माननीय बेञ्चमा छ भन्ने विश्वास व्यक्त गर्छु।” राजधानीको तीनकुने गत चैत १५ गते भएको हिंसात्मक घटनालाई लिएर मिश्र पक्राउ परेका थिए ।
