काठमाडौं, १९ जेठ २०८२ । नेकपा (माओवादी केन्द्र) का अध्यक्ष पुष्पकमल दाहाल ‘प्रचण्ड’ ले राजावादीहरुले भाडामा ल्याएका केही मान्छेहरु छाडा भएको टिप्पणी गरेका छन् । आइतबार पार्टीको सहायक संगठन योङ्ग कम्युनिष्ट लिग (वाईसीएल) नेपालको तेस्रो राष्ट्रिय सम्मेलनलाई सम्बोधन गर्दै उनले राजावादीहरु आइलागेको खण्डमा जाइलागेर ईटको जवाफ पत्त्थरले दिन आग्रह गरे । उनले राजावादीहरुको निसानामा माओवादी केन्द्र रहेको पनि सुनाए ।
‘अहिले राजावादीहरुले कता–कताबाट पैसा ल्याएका छन् । पैसा त उनीहरुले थुपारेकै होलान् । त्यही पैसाको बलमा भाडाका मान्छे ल्याउने, छाडा बनाउने, जाँड खुवाउने, उफार्ने गरेको मैले देखिराखेको छु । तपाईँहरुले पनि देखिराख्नु भएको छ । म के भन्न चाहन्छु भने– हामीहरु जाइलाग्ने चाही होइन, उनीहरुको सभामा, उनीहरुको आन्दोलनमा हामीले गएर आक्रमण गर्ने मैले भन्न खोजेको छैन । तर, उनीहरु छाडा भएका छन् । छाडा भएर हामीमाथि आक्रमण गर्ने कोशिस गर्दैछन् । यदि उनीहरु आइलाग्छन् भने ईटको जवाफ पत्त्थरले दिने तयारी गर्नुस् । गर्नैपर्छ,’– उनले भने ।
