विराटनगर, जेठ २० । मोरङको कटहरी गाउँपालिका–२ हल्दीबारीमा २ अर्ब लागतमा निर्मित २०० बेड क्षमताको जीवन विकास सामुदायिक अस्पताल तयार भएको छ। जीवन विकास समाजको नेतृत्वमा निर्माण भएको यो अस्पतालको औपचारिक उद्घाटन आगामी जेठ २४ गते प्रधानमन्त्री केपी शर्मा ओलीले गर्नेछन्।
सामाजिक व्यवसायको मोडलमा सञ्चालन हुने यो अस्पतालले मुनाफा वितरण नगर्ने नीति अपनाएको छ। एकैपटक २०० बेडसहित सेवा सुरु गर्ने यो नेपालकै पहिलो अस्पताल भएको अस्पतालका अध्यक्ष तथा सांसद योगेन्द्र मण्डलले जानकारी दिए।
२०५४ सालमा स्थापना भएको जीवन विकास समाजले सुरुमा मोरङको अमाहीबरियातीमा २४ घण्टे क्लिनिक सञ्चालन गरेको थियो। त्यसैको विकसित रूप आज अत्याधुनिक सुविधासम्पन्न अस्पताल बनेको छ। भविष्यमा यसलाई मेडिकल कलेजसम्म विस्तार गर्ने योजना रहेको छ।
२० बिघा क्षेत्रफलमा निर्मित सात तले भवनमा आकस्मिक सेवा, विशेषज्ञ चिकित्सकको ओपीडी, डेलिभरी सेवा, शल्यक्रिया, बाल चिकित्सा, एक्स-रे, अल्ट्रासाउन्डलगायत सम्पूर्ण स्वास्थ्य सेवा उपलब्ध हुनेछ। अस्पतालमा २५ शैय्याको आईसीयू, १० शैय्याको सीसीयू र एचडियू, एनआईसीयू, पीआईसीयू, विभिन्न वार्ड र अपरेसन थिएटर सुविधा छन्।
