विराटनगर २८ जेठ : विराटनगर महानगरपालिकाले केही दिनदेखि बढेको अत्यधिक गर्मीलाई मध्यनजर गर्दै महानगरभित्र सञ्चालित सम्पूर्ण विद्यालयहरूलाई तीन दिनका लागि बन्द गर्न निर्देशन दिएको छ। प्रमुख प्रशासकीय अधिकृत रामप्रसाद ढुंगेलले एक सूचनामार्फत जेठ २८ देखि ३० गतेसम्म विद्यालयमा पठनपाठन बन्द गराउन आग्रह गरेका हुन् ।
महानगरपालिकाद्वारा विद्यालयहरूलाई पठाइएको पत्रमा भनिएको छ,’प्रस्तुत विषयमा केही दिनदेखि बढेको अत्यधिक गर्मीका कारण विद्यालयमा पठनपाठन लगायतका गतिविधि गर्न कठिनाइ भएको तथा बालबालिकाको स्वास्थ्य जोखिमलाई समेत मध्यनजर राख्दै यस महानगरपालिका भित्र सञ्चालित सम्पूर्ण विद्यालयको पठन पाठन मिति २०८२-०२-२८ देखि २०८२-०२-३० गतेसम्म बन्द गर्न गराउन जानकारी गराइन्छ।’
यसका साथै, महानगरपालिकाले यस अवधिमा तापक्रममा गिरावट आएमा वा वर्षात भई विद्यालय सञ्चालन गर्न अनुकूल भएमा विद्यालयहरूलाई नियमित पठनपाठनको व्यवस्था मिलाउन समेत भनेको छ।
