सोलुखुम्बु, साउन ६। थुलुङ दुधकोशी गाउँपालिका–२ का वडाध्यक्ष युजन बस्नेतले खुट्टा भाँचिएर घरमै थला परेकी एक दलित महिलाको आफैं मोटरसाइकलमा राखेर उद्धार गरेका छन्।
करीव ४२ वर्षीय कुमारी नेपालीलाई दुई दिनअघि काम गर्ने क्रममा लडेर खुट्टा भाँचिएको थियो। आर्थिक अवस्था कमजोर भएका कारण उपचार नगराई दुई-तीन दिनदेखि घरमै बसिरहेको स्थानीयले जानकारी गराएपछि मंगलवार वडाध्यक्ष बस्नेत उद्धारका लागि पुगेका थिए।
बाढी पहिरोका कारण स्थानीय सडकहरू क्षतिग्रस्त बनेपछि एम्बुलेन्स पुग्न नसक्ने अवस्था थियो। लङखु खोलाले सडक बगाएपछि आवतजावतमा समेत समस्या सिर्जना भएको छ। खोलामा बाढीले सबै सडक हिलो बनाएको र एम्बुलेन्स समेत पुग्न नसक्ने अवस्थामा बिरामी थलिएको जानकारी पाएपछि वडाध्यक्ष बस्नेतले आफैं मोटरसाइकल लिएर उद्धारमा पुगेका हुन्।
“काम गर्ने क्रममा लडेर उहाँको खुट्टा भाँचिएको रहेछ, आर्थिक अवस्था कमजोर भएका कारण उपचार नगराई दुई-तीन दिनदेखि घरमै बसिरहनु भएको थाहा पाएर उद्धार गरिएको हो,” वडाध्यक्ष बस्नेतले भने। “एम्बुलेन्स बोलाउँदा बाटो बिग्रिएर आउन सकेन, स्ट्रेचरमा लैजान पनि कठिन भएकोले मोटरसाइकलमै अस्पताल लगियो।”
उनले थप भने, “त्यो खोलाको बाटोमा हिलो थियो, एम्बुलेन्स आउन सक्दैनथ्यो, मैले आफैं उद्धार गरेर सरकारी अस्पताल पुर्याएँ।”
घाइते महिलालाई थुलुङ दुधकोशी गाउँपालिकामा रहेको प्राथमिक स्वास्थ्य केन्द्र पुर्याइएको छ। गाउँपालिकाले निर्माण गरेको यस अस्पतालमा दुई जना एमडी डाक्टर कार्यरत छन्।
२९ वर्षीय युवा जनप्रतिनिधि बस्नेतले उपचार नै नपाएर अपाङ्गता हुनुपर्ने अवस्थामा रहेका नागरिकको अस्पतालसम्म पुर्याउनु जनप्रतिनिधिको दायित्व भएको बताए। उनले नागरिकको दिनरात सेवा गर्ने गरेको जानकारी दिए।
स्थानीयका अनुसार वडाका जुनसुकै ठाउँमा पनि समस्या पर्दा एम्बुलेन्स जस्तै वडाध्यक्ष बस्नेत पुगिहाल्ने गर्छन्। बाढी पहिरोका कारण स्थानीय सडकहरू क्षतिग्रस्त बनेका कारण आपतकालिन सेवाका सवारी साधन संचालनमा समेत कठिनाई भएको उनले बताए।
