विराटनगर, ११ साउन । कोशी प्रदेश प्रहरीले आर्थिक वर्ष २०८१/०८२ मा फरार प्रतिवादीहरूलाई पक्राउ गर्न सञ्चालन गरेको विशेष अभियानमा उल्लेखनीय सफलता हासिल गरेको छ। असार मसान्तसम्म प्रदेशका सबै जिल्लाहरूबाट जम्मा ३,५१३ जना फरार प्रतिवादी पक्राउ परेका छन्।
जिल्लागत विवरणअनुसार मोरङबाट १,१५६ जना, सुनसरीबाट १,००२ जना, झापाबाट ५३४ जना, उदयपुरबाट २६० जना, इलामबाट १४६ जना, ओखलढुंगाबाट ६९ जना, धनकुटाबाट ५७ जना, खोटाङबाट ५३ जना, ताप्लेजुङबाट ४८ जना, तेह्रथुमबाट ४५ जना, भोजपुरबाट ४४ जना, पाँचथरबाट ४२ जना, संखुवासभाबाट २८ जना, सोलुखुम्बुबाट १४ जना र प्रादेशिक अनुसन्धान समूहबाट १५ जना पक्राउ परेका छन्।
पक्राउ परेका व्यक्तिहरूबाट जम्मा १,४१६ वर्षभन्दा बढी कैद सजाय र जरिवानाबापत १४ करोड ७७ लाखभन्दा बढी राजस्व संकलन भएको छ।
प्रहरीले कानूनी राज्यको स्थापना र न्याय प्रणालीलाई प्रभावकारी बनाउने उद्देश्यले यो अभियान सञ्चालन गरिरहेको र विशेष रणनीति, सूचना प्रविधिको प्रयोग तथा समुदायसँगको समन्वयमार्फत यस्तो सफलता हासिल गरेको जनाएको छ।
प्रहरीले नागरिकहरूलाई आफ्नो वरपरका फरार व्यक्तिहरूको बारेमा गोपनीयता कायम राखी सूचना उपलब्ध गराउन अनुरोध गरेको छ।
