विराटनगर,१३ साउन ।
विराटनगरकी सृजा पोखरेल् एनआरएनए अस्ट्रेलिया स्थित तास्मानिया नारी निकुञ्जको महिला संयोजकमा विजयी भएकी छन् । तास्मानियामा बसोबास गर्ने नेपाली महिलाहरूको आवाज र सशक्तिकरणको अभियानलाई संस्थागत बनाउँन भन्दै उम्मेदवारी दिएकी पोखरेल विजयी बन्न सफल भएकी हुन्।
नेपालबाट २०१८ मा तास्मानिया पुगेकी पोखरेल विगत ६ वर्षदेखि नेपाली समुदायको सेवा र पहिचानको संरक्षणमा निरन्तर सक्रिय छिन्। चाहे नेपाली भाषा र लोकनृत्य सिकाउने शिक्षिका, नेपाली सोसाइटी अफ नर्दन तास्मानियाको कार्यकारी सदस्य, रेडक्रसमा स्वास्थ्य शिक्षिकाकारुपमा उनको योगदान बहुआयामिक रहँदै आएको थियो ।
विजयी भएसंगै पोखरेलले भनेकी छन् “समुदायसँगको मेरो यो यात्रा केवल जिम्मेवारी होइन, यो मेरो आत्मीयता र पहिचानको निरन्तर यात्रासँग जोडिएको छ। अब महिलाहरूको निर्णायक सहभागिता र नेतृत्व विकासमा सशक्त अभियान अघि बढाउने प्रतिबद्धताका साथ काम गर्ने छु । ” उनको घर विराटनगर -२ स्थित सरस्वतीटोलमा रहेको छ । नेपालमा रहदा पनि युवा अभियन्ताकारुपमा सक्रिय पोखरेल हाल अस्ट्रेलियामा पनि सामाजिक सक्रियतामा ख्याती कमाउदै छिन् ।
