काठमाडौं, २ मंसिर – प्रहरीले दुर्गा प्रसाईंलाई पक्राउ गरेको छ। जिल्ला प्रहरी परिसर काठमाडौं र काठमाडौं उपत्यका अपराध अनुसन्धान कार्यालयको संयुक्त टोलीले सोमबार मध्यरातमा भक्तपुरस्थित उनको आवासबाट प्रसाईंलाई नियन्त्रणमा लिएको हो।
हिंसा भड्किने गरी अराजक गतिविधि गर्न अभिव्यक्ति दिएको आरोपमा उनलाई पक्राउ गरिएको प्रहरी स्रोतले जानकारी दिएको छ।
राजावादी गतिविधिमा सक्रिय प्रसाईं यसअघि पनि प्रहरीको नियन्त्रणमा परेका थिए। गत चैत १५ को हिंसात्मक आन्दोलनपछि पक्राउ परेका उनी अदालतको आदेशपछि रिहा भएका थिए। त्यसपछि उनी बैंकबाट लिएको ऋण मिनाहा गरिदिनुपर्ने लगायतका मागसहित मंसिर ७ गतेदेखि आन्दोलनको तयारीमा जुटेका थिए।
तर योजनाबद्ध आन्दोलन सुरु हुनुअघि नै प्रहरीले उनलाई गिरफ्तार गरेपछि नागरिक बचाउ दलले तोकिएको मितिको प्रतीक्षा नगरी आजैबाट संघर्षमा उत्रने घोषणा गरेको छ। पार्टीका महामन्त्री प्रेमकुमार थाम्सुहाङले प्रसाईंको गिरफ्तारीलाई अपहरण शैलीको संज्ञा दिँदै सरकारले शान्ति भंग गरेको आरोप लगाए। संगठनले आज पहिलो चरणमा जिल्ला प्रशासन कार्यालयमा ध्यानाकर्षणपत्र बुझाउने र त्यसपछि देशव्यापी प्रदर्शन सुरु गर्ने महामन्त्री थाम्सुहाङले बताए।
