काठमाडौं , मंसिर १५। प्रहरीको केन्द्रीय अनुसन्धान ब्यूरो (सीआईबी)ले प्रभु बैंकका प्रमुख कार्यकारी अधिकृत (सीईओ) अशोक शेरचनसहित तीन उच्च अधिकारीलाई बैंकिङ कसुर र कर्जा दुरुपयोगको आरोपमा पक्राउ गरेको छ।
सोमबार बिजुलीबजारस्थित बैंकको प्रधान कार्यालयबाट पक्राउ गरिएकामा सीईओ शेरचनसहित नायब प्रमुख कार्यकारी अधिकृत मणिराम पोखरेल र प्रमुख कर्जा अधिकृत रिवास श्रेष्ठ रहेका छन्।
सीआईबीले जारी गरेको विज्ञप्तिअनुसार राष्ट्र बैंकबाट भएको निर्देशन तथा प्रचलित कानूनविपरीत काम गरी प्रभु बैंकलाई हानिनोक्सानी पुर्याएको आरोप लागेको छ। विभिन्न कम्पनीको नाममा करोडौं रुपैयाँ कर्जा प्रवाह गरी कर्जाको दुरुपयोग गर्ने तथा सोही अपराधलाई लुकाउने प्रयास गरेको आरोप उनीहरूमाथि छ।
यसअघि गत कात्तिक २२ गते सीआईबीले बैंकको केन्द्रीय कार्यालयमा छापा मारी महत्त्वपूर्ण कागजात नियन्त्रणमा लिएको थियो। सीआईबीले ११ कात्तिकमा प्रभु समूहका अध्यक्ष तथा एमालेका पूर्वसांसद देवीप्रकाश भट्टचनलाई पनि पक्राउ गरिसकेको छ।
प्रभु म्यानेजमेन्टकी अध्यक्ष कुसुम लामाले दिएको ९८ करोड रुपैयाँ ठगीको जाहेरीको विषयमा सीआईबीले अनुसन्धान गरिरहेको छ। नेपाल राष्ट्र बैंकको प्रतिवेदनका आधारमा प्रहरीले कारबाही अगाडि बढाएको हो।
