काठमाडौं, असोज १०
बडा दैशालाई लक्षित गर्दै नेपाल राष्ट्र बैंकले आजबाट देशैभरी नयाँ नोट वितरण शुरु गरेको छ । राष्ट्र बैंकका अनुसार सटही सुविधा असोज १० देखि १७ गतेसम्म उपलब्ध हुनेछ ।
उपत्यकाभित्र बालुवाटरस्थित राष्ट्र बैंकको मुद्रा व्यवस्थापन विभागवाट सेवाग्राहीले नयाँ नोट साट्न सक्नेछन् । त्यसबाहेक नेपाल बैंक लिमिटेड, राष्ट्रिय वाणिज्य बैंक र कृषि विकास बैंक लिमिटेडका शाखाबाट पनि सेवाग्राहीले नयाँ नोट साट्न सक्छन् । त्यस्तै, राष्ट्रिय वाणिज्य बैंकको केन्द्रीय कार्यालयसँगै अन्य शाखाहरुबाट पनि नयाँ नोट सटही आजैबाट शुरु भएको छ ।
राष्ट्र बैंकले अन्य गैर सरकारी बैंक तथा वित्तीय संस्थालाई पनि नयाँ नोट उपलब्ध गराएको छ । गैर सरकारी बैंकहरुमा खाता हुनेले समेत सजिलै नयाँ नोट निकालन सक्ने राष्ट्र बैंकको भनाइ छ ।
उपत्यका बाहेक राष्ट्र बैंकका विराटनगर, जनकपुर, वीरगञ्ज, पोखरा, सिद्धार्थनगर, नेपालगञ्ज र धनगढी कार्यालयबाट पनि आजैबाट नयाँ नोट वितरण गर्ने शुरु गरिएको छ । यी कार्यलयहरुमा पनि उपत्यकामा जस्तै असोज १० देखि १७ गतेसम्म नयाँ नोट वितरण हुने बताईएकोछ ।यस पटक एक व्यक्तिले अधिक्तम १८ हजार ५ सय रुपैयाँका मात्र साट्न पाउने छ । अघिल्लो वर्ष प्रतिव्यक्ति २७ हजार रुपैयाँसम्म सटहि गरिएको थियो ।
