१४ फागुन, काठमाडौं । आगामी निर्वाचनमा मतदाता नामावलीमा नाम दर्ता भएका नागरिकले मतदाता परिचयपत्र नभए पनि अन्य सरकारी परिचयका कागजातका आधारमा मत खसाल्न पाउने भएका छन् ।
निर्वाचन आयोगका अनुसार प्रतिनिधि सभा सदस्य निर्वाचन (मतदान) निर्देशिका २०८२ ले मतदाता परिचयपत्र अनिवार्य रूपमा साथमा राख्नुपर्ने व्यवस्था गरे पनि सो उपलब्ध नभएको अवस्थामा नागरिकता प्रमाणपत्र, राष्ट्रिय परिचयपत्र, राहदानी, जग्गाधनी प्रमाणपूर्जा वा सवारी चालक अनुमतिपत्रमध्ये कुनै एउटा कागजात प्रस्तुत गरी मतदान गर्न सकिने छ ।
उच्चस्तरीय निर्वाचन सुरक्षा समितिले मतदान केन्द्रमा खटिने सुरक्षाकर्मी, कर्मचारी तथा सम्बन्धित सरोकारवालाहरूलाई यस व्यवस्थाबारे स्पष्ट जानकारी दिने निर्णय गरेको छ, ताकि कुनै पनि योग्य मतदाता मतदानबाट वञ्चित हुन नपरोस् ।
