कञ्चनपुर, जेठ १५ । शुक्रवार बिहान सिरहाको गोलबजार नगरपालिका-४ निपनियामा स्थानीयवासीले कञ्चनपुर–कमला सडक विस्तार आयोजनामा भएको ढिलासुस्तीविरुद्ध टायर जलाउँदै पूर्व-पश्चिम राजमार्ग अवरुद्ध गरे। ‘चाइना रेलवे नं. २ इन्जिनियरिङ ग्रुप’ले ठेक्का लिएको करिब ७ वर्ष बित्दासमेत सडक निर्माण अधुरै रहेकाले नागरिकले दैनिक सास्ती भोग्नुपरेको स्थानीयकाे गुनासाे छ। साढे एक घण्टाको अवरोधपछि कम्पनी प्रतिनिधि र स्थानीय तहसँग छलफल गर्ने सहमतिमा राजमार्ग खुलाइयो। स्थानीय नेताले सन्तोषजनक निष्कर्ष नआए पुनः आन्दोलन गर्ने चेतावनी दिएका छन्।
एडीबीको ऋण सहयोगमा निर्मित यस ८६.८३ किलोमिटर सडकको भौतिक प्रगति हालसम्म ६८ प्रतिशत मात्र पुगेको छ। असार १६ गते सकिने म्याद थपिने अवस्था देखिँदै गर्दा सुरुवाती लागतभन्दा झण्डै ३ अर्ब रुपैयाँ बढी खर्च भइसकेको छ।
