विराटनगर, साउन १५ । आधारभूत स्वास्थ्य सेवा समुदायमै उपलब्ध गराउने उद्देश्यका साथ बिहिबार लायन्स क्लब अफ विराटनगरले साप्ताहिक “लायन्स मोहल्ला क्लिनिक” शुभारम्भ गरेकाे छ। लाइफ गार्ड हस्पिटल प्रा. लि. विराटनगरको प्राविधिक सहकार्य तथा लियो क्लब अफ विराटनगरको सहयोगमा सञ्चालन हुने यस क्लिनिकमार्फत स्थानियलाई नियमित रूपमा निःशुल्क स्वास्थ्य परामर्श, रक्तचाप (BP) जाँच, रगतमा चिनी (Sugar) जाँच तथा स्वास्थ्य सचेतना सेवा प्रदान गरिनेछ।
विराटनगर–६ स्थित मदरसा शाहबाजिया, सरोचियामा हरेक बिहीबार बिहान ८ बजेदेखि १० बजेसम्म सञ्चालन हुने यो कार्यक्रम लायन्स वर्ष २०२६/२७ (जुलाई २०२६ देखि जुन २०२७ सम्म) नियमित रूपमा जारी रहनेछ। शुभारम्भमा प्रसूति तथा स्त्रीरोग विशेषज्ञ डा. कल्पना कुमारी यादवले प्रसूति तथा स्त्रीरोगसम्बन्धी विविध जाँच तथा सेवा उपलब्ध गराउनुभएकाे थियाे। साे क्लिनिकमार्फत निःशुल्क चिकित्सक परामर्श, रक्तचाप जाँच, रगतमा चिनी जाँच लगायत स्वास्थ्य परामर्श तथा सचेतनामूलक सेवा उपलब्ध गराइने बताईएकाे छ।
शुभारम्भ कार्यक्रममा लायन्स क्लब अफ विराटनगरका अध्यक्ष लायन चन्द इराकीले समुदायका सबै नागरिकलाई यस सेवाको लाभ लिन हार्दिक अनुरोध गर्नुभयाे । वहाँले भन्नुभयो, “लायन्स क्लब अफ विराटनगरले समुदायमै पुगेर नियमित स्वास्थ्य सेवा प्रदान गर्ने उद्देश्यले ‘लायन्स मोहल्ला क्लिनिक’ सुरु गरेको हो। यो एकदिने कार्यक्रम होइन, लायन्स वर्षभर हरेक बिहीबार सञ्चालन हुनेछ।”
