विराटनगर, २०८३ साउन २२ । कोशी प्रदेशका मुख्यमन्त्री हिक्मत कुमार कार्की बिहीबार दिउँसो विराटनगर पुगेका छन्। नेकपा एमालेका अध्यक्ष केपी शर्मा ओलीसँग काठमाडौंमा भेटवार्ता गरेर उनी विराटनगर फर्किएका हुन्। काेशी प्रदेशकाे सरकार नेतृत्व छाेड्न पार्टीबाट दवाव आइरहेकाे बेला ओलीलाई भट्न पुगेका मुख्यमन्त्री कार्कीले यस भेटलाई पार्टीभित्रैको आन्तरिक छलफलकाे मात्र संज्ञा दिएका छन् ।
विराटनगर विमानस्थलमा पत्रकारहरूसँग कुरा गर्दै मुख्यमन्त्री कार्कीले अध्यक्ष ओलीसँगको भेटघाट पार्टीभित्रैको आन्तरिक छलफल रहेको जनाए। पार्टी अध्यक्षले पार्टी कमिटी र प्रदेश कमिटीलाई पार्टीको निर्णयबारे जानकारी गराइसकेको उनले बताए।
कोशी प्रदेशमा एमाले र नेपाली कम्प्युनिष्ट पार्टी (नेकपा) बीचको सत्ता साझेदारी र साउन ९ गतेको सहमति कार्यान्वयनबारे पनि मुख्यमन्त्रीले स्पष्ट पारे। साउन ९ को सहमति पूर्णरूपमा र अक्षरशः पालना गरिने प्रतिबद्धता उनले दोहोऱ्याए। नेपाली कांग्रेसका मन्त्रीहरूको राजीनामा र प्रदेश सरकारकाे नँया समिकरणबारे बोल्दै मुख्यमन्त्री कार्कीले हाल राजीनामाभन्दा सबैलाई मिलाएर अघि बढाउने प्रयासमा जोड दिइरहेको बताए। कांग्रेसको केन्द्रीय नीतिका कारण केही समस्या देखा परेको स्वीकार गर्दै भोलिदेखि नै यसबारे छलफल थालिने र केही दिनभित्रै समाधान निस्कने विश्वास उनले व्यक्त गरे। पार्टी इन्चार्जले मार्ग प्रशस्त गर्न राजीनामा दिन सुझाएको भन्ने चर्चाबारे सोधिएको प्रश्नमा उनले पार्टीभित्रकै आन्तरिक विषय भन्दै धेरै बोल्न चाहेनन् ।
