विराटनगर, पुष १८
विगतमा विराटनगर भंसारका अधिकृत समेत रहेका अर्थ मन्त्रालयका उपसचिव राजेन्द्र ढुङ्गानाविरुद्ध साढे ४ करोड भन्दा बढीको भ्रष्टाचार मुद्दा दायर भएको छ ।
ढुङ्गाना १९ साउन २०४९ मा सरकारी सेवामा प्रवेश गरेका थिए । ढुङ्गानाले त्यसयता विभिन्न क्षेत्रमा गरी कूल ५ करोड ४८ लाख ३ हजार ३ सय ५१ रुपैयाँ खर्च तथा लगानी गरेका अख्तियारको छानबिनमा देखिएको छ ।
उनले त्यस अवधिमा ७९ लाख ५४ हजार ७ सय ९५ रुपैयाँ मात्रै वैध रुपमा आम्दानी गरेको देखिएको छ । उनले लगानी तथा खर्च गरेको ४ करोड ६८ लाख ४८ हजार ५ सय ५६ रुपैयाँको स्रोत खुल्न सकेको छैन् ।
अख्तियारका अनुसार ढुङ्गानाले आफ्नी श्रीमती मघु कोइरालाका नाममा समेत चल तथा अचल सम्पत्ति खरिद गरेका छन् ।
अख्तियारले विषेश अदालतमा ढुङ्गानाविरुद्ध विगोअनुसार जरिवानाका र अवैध रुपमा आर्जिक सम्पत्ति जफतका साथै २ वर्ष कैद सजाय समेत मागदाबी गरेको छ । त्यसका साथै ढुङ्गानाकी श्रीमती मधुको नाममा कायम भएको संशकित सम्पत्ति जफतको समेत अख्तियारले मागदाबी गरेको छ ।
केहि समय अघि अर्थमन्त्रालयकै उपसचिव एवं विराटनगर भन्सारका पुर्व प्रमुख कृष्ण बहादुर बस्नेतविरुद्ध पनि १० करोडभन्दा बढी अवैध सम्पति आर्जन गरेको भष्ट्रचार मुद्दा अख्तियारले दायर गरेको थियो ।
