विराटनगर, पुष २३
पुष १ गतेबाट विराटनगरको जैन भवनमा शुरु भएको विराट जुत्ता–चप्पल मेला अब एक हप्तासम्म मात्र रहने भएको छ । आजयोकले पुष २९ गते मेलाको समापन हुने बताएको छ ।
आयोजकका अनुसार विराट जुत्ताचप्पल मेलामा हालसम्म १ करोड ५० लाख रुपैयाँको कारोबार भएको छ । दैनिक ८ लाखदेखि १२ लाख रुपैयाँसम्मको कारोबार भएको व्यापारीहरूले बताएका छन् ।
मेलामा दैनिक करीब ८ हजारसम्म ग्राहक आउने गरेको आयाेजकले जनाएकाे छ । १ लाख ५० हजार दर्शकको भ्रमणबाट ५० हजार जोर जुत्ता विक्री गरी १ करोड ५० लाख रुपैयाँ कारोबार गर्ने लक्ष्य राखिएको मेलाले समयअघि नै कारोबार लक्ष्य पूरा गरेको आयोजकको भनाई छ ।
मेलामा शिखर सुज, बिएफ डियर हिल सुज, रन सुज, शु लैण्ड, लैण्ड वाक र हाइ लाईफ सुज एण्ड स्लीपरका ब्राण्डका जुत्ताचप्पल उपलब्ध छन् । १ सयदेखी १० हजार मुल्यसम्मका जुत्ता चप्पल मेलामा राखिएका छन् । विभिन्न ब्राण्डका जुत्ताचप्पलहरुमा ग्राहकलाई ६० प्रतिशतसम्म छुट दिईएको छ ।
