विराटनगर, चैत २९
विराटनगरका उद्योगी–व्यवसायीहरु नेपाल उद्योग परिसंघमा संगठित भएका छन् । विराटनगरका पुराना उद्योगी व्यवसायी, उद्योग संगठन मोरङका पूर्व पदाधिकारी र केही ठुला उद्योगी व्यवसायी परिसंघमा संगठित भएका हुन् ।
नेपाल उद्योग वाणिज्य महासंघको ५५ औं साधारणसभा हुन लागीरहेको बेलामा विराटनगरका उद्योगी व्यवसायी परिसंघमा संगठित भएका छन् । सो परिसंघको गठनले निकट भविष्यमा हुन लागीरहेको उद्योग वाणिज्य महासंघको चुनाव समेत ठुलो प्रभाव पार्ने बुझिएको छ ।
उक्त परिसंघ संचालनको लागी बनाइएको तदर्थ समितिको अध्यक्षमा भीम घिमिरे चुनिएका छन् । उनी उद्योग संगठन मोरङका निवर्तमान अध्यक्ष हुन् । त्यस्तै समितिको वरिष्ठ उपाध्यक्षमा मोरङ व्यापार संघका अध्यक्ष प्रकाश मुन्दडा, उपाध्यक्षमा नबलकिशोर काबरा, सुशीलकुमार जोशी, कृष्णकुमार अग्रवाल, दीपक पौडेल र देवेन्द्र गुप्ता चुनिएका छन् ।
तदर्थ समितिका कोषाध्यक्षमा गिरीश लुनियाँ चयन भएका छन् । मधु लोहियाको सभापतित्वमा महिला उद्यम तदर्थ समिति र गोपाल अग्रवालका सभापतित्वमा युवा उद्यमी उपसमितिको गठन समेत गरेको छ ।
